'పైన పటారం' ప్రోమో: కెలికి చూస్తే అసలు బండారం తెలిసిపోద్దంటూ రచ్చ చేసిన అనసూయ

మెగా ప్రొడ్యూసర్ అల్లు అరవింద్ సమర్పణలో గీతా ఆర్ట్స్ 2 బ్యానర్‌ పై బన్నీ వాస్ నిర్మిస్తున్న చిత్రం ''చావు కబురు చల్లగా''. యువ హీరో కార్తికేయ - లావ‌ణ్య త్రిపాఠి జంటగా నటిస్తున్న ఈ సినిమాతో కొత్త దర్శకుడు పెగళ్ళపాటి కౌశిక్ ఇండస్ట్రీకి పరిచయం అవుతున్నాడు. ఈ చిత్రాన్ని మార్చి 19న భారీ స్థాయిలో విడుద‌ల చేయ‌డానికి మేకర్స్ స‌న్నాహాలు చేస్తున్నారు. ఈ నేపథ్యంలో ఇప్పటికే విడుదలైన హీరో కార్తికేయ 'బ‌స్తి బాల‌రాజు' ఫ‌స్ట్ లుక్ - టీజర్ మరియు లిరికల్ సాంగ్స్ కు మంచి రెస్పాన్స్ వచ్చింది. ఈ క్రమంలో 'చావు కబురు..' నుంచి 'పైన పటారం' అనే ఐటమ్ సాంగ్ ప్రోమోని చిత్ర యూనిట్ తాజాగా విడుదల చేసింది.

''పైన పటారం.. ఈడ లోన లోటారం.. విను బాసూ చెప్తాను ఈ లోకం యవ్వారం'' అంటూ సాగిన ఈ ఐటమ్ సాంగ్ లో హీరో కార్తికేయతో కలిసి యాంకర్ అనసూయ రెచ్చిపోయి స్టెప్పులేసింది. 'పైకి బంగారం.. లోన గూడు పుటారం.. కెలికి సూడు తెలిసిపోద్ది అసలు బండారం' అంటూ సాగిన ఈ సాంగ్ ప్రోమోకి అనూహ్య స్పందన వస్తోంది. రేపు థియేటర్స్ లో అనసూయతో చేసిన ఈ ఐటమ్ సాంగ్ దుమ్ము దులిపనుందని కామెంట్స్ వస్తున్నాయి. ఈ మాస్ బీట్ కి జేక్స్‌ బిజోయ్ ట్యూన్ అందించారు. అన‌సూయ చిందేసిన‌ ఈ మాస్ ఐటెమ్ నెంబర్ ఫుల్ సాంగ్ ని మార్చి 1న సాయంత్రం 4 గంట‌ల 5 నిమిషాల‌కి విడుద‌ల చేస్తున్న‌ట్లుగా చిత్ర యూనిట్‌ ప్రకటించింది.