'ప్లాన్ ఎ ప్లాన్ బి' ట్రైలర్: మ్యాచ్ మేకర్ - డివోర్స్ లాయర్ మధ్య ప్రేమకథ..!

మిల్కీ బ్యూటీ తమన్నా భాటియా మరియు బాలీవుడ్ స్టార్ రితేష్ దేశ్ ముఖ్ ప్రధాన పాత్రల్లో నటించిన రొమాంటిక్ వెబ్ సిరీస్ "ప్లాన్ A ప్లాన్ B". ఓటీటీ దిగ్గజం నెట్ ఫ్లిక్స్ ఈ సిరీస్ ను రూపొందించింది. ఇప్పటికే వచ్చిన టీజర్ అందరినీ ఆకట్టుకుంది. ఈ నేపథ్యంలో రిలీజ్ కు రెడీ అయిన ఈ సిరీస్ ట్రైలర్ ను తాజాగా మేకర్స్ లాంచ్ చేశారు.

'ప్లాన్ ఎ ప్లాన్ బి' ట్రైలర్ ను షేర్ చేస్తూ.. "1 మ్యాచ్‌ మేకర్ + 1 విడాకుల లాయర్ = 2 మార్గాల్లో వెళ్లగల 1 ఏకైక ప్రేమకథ!" అని నెట్ ఫ్లిక్స్ పేర్కొంది. పెళ్లి మరియు విడాకుల కాన్సెప్ట్ చుట్టూ ఇద్దరు విరుద్ధ భావాలు గలిగిన వ్యక్తుల మధ్య లవ్ స్టోరీని ఈ ట్రైలర్ ఆవిష్కరిస్తోంది.

పెళ్లిపై నమ్మకం లేని వివాహిత జంటలను విడాకులతో వేరు చేస్తున్న డివోర్స్ లాయర్ కోస్తీగా రితేష్ దేశ్ ముఖ్ ని పరిచయం చేయడంతో ఈ ట్రైలర్ ప్రారంభమవుతుంది. ప్రేమ - పెళ్లిపై నమ్మకమున్న సైకాలజిస్ట్ కమ్ మ్యాచ్ మేకర్ నిరాలీగా తమన్నా కనిపించింది.

మ్యారేజ్ కౌన్సెలర్ అయినప్పటికీ తమన్నా ఒంటరిగా జీవిస్తోంది. మరోవైపు రితీష్ వివాహం అనేది ఒక శిక్ష అని నమ్ముతాడు. కానీ అతను వన్ నైట్ స్టాండ్స్‌ తో ఎంజాయ్ చేస్తున్నాడు. వీరిద్దరూ ఒకరినొకరు ఎదురుపడినప్పుడు పరస్పర విరుద్ధ భావాలతో మాటల యుద్ధం చేయడాన్ని ట్రైలర్ లో చూపించారు.

కంపాటిబిలిటీ టెస్ట్ లో రితేష్ - తమన్నా జంటకు 35 శాతం మాత్రమే అనుకూలత ఉన్నట్లు మనం గమనించవచ్చు. విభిన్న దృక్కోణాల కారణంగా.. ఒకరంటే ఒకరు ఇష్టపడని విభిన్న వ్యక్తుల మధ్య జరిగే ప్రేమకథను ఈ ట్రైలర్ ప్రదర్శిస్తుంది. అయితే క్లైమాక్స్ కి ఏం జరుగుతుందనేది సస్పెన్స్‌ గా ఉంది.

తమన్నా మరియు రితేష్ మధ్య కెమిస్ట్రీ బాగా కుదిరింది. ఇద్దరూ తమ పాత్రల్లో కన్విన్సింగ్‌ గా కనిపిస్తున్నారు. పూనం దిల్లోన్ - కుశా కపిల ఇతర ప్రధాన పాత్రలు పోషించారు. మొత్తం మీద ఈ రోమ్-కామ్ ట్రైలర్ ప్రేక్షకులను ఆకట్టుకునేలా ఉంది.

''ప్లాన్ ఎ ప్లాన్ బి'' సిరీస్ కు 'వీరే ది వెడ్డింగ్' ఫేమ్ శశాంక ఘోష్ దర్శకత్వం వహించారు. రజత్ అరోరా స్క్రిప్ట్ అందించారు. ఇండియా స్టోరీస్ మీడియా మరియు ఫంక్ యువర్ బ్లూస్ సంయుక్తంగా ఈ ఒరిజినల్ ని నిర్మించాయి.

'ప్లాన్ A ప్లాన్ B' సిరీస్ నెట్ ఫ్లిక్స్ ఓటీటీలో సెప్టెంబర్ 30వ తేదీ నుంచి స్ట్రీమింగ్ కానుంది. ఇప్పటికే ‘లెవన్త్ అవర్’ ‘నవంబర్ స్టోరీస్’ వెబ్ సిరీస్ లతో డిజిటల్ వేదికలపై సత్తా చాటిన తమన్నా.. ఈసారి రితేష్ దేశ్ ముఖ్ తో కలిసి ఎలాంటి గుర్తింపు తెచ్చుకుంటుందో చూడాలి.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.