కామెడీ చాల్లే కార్తికేయా..

సక్సెస్ సాధించడం కంటే దాన్ని నిలబెట్టుకోవడం చాలా కష్టమని అంటారు. సినీ పరిశ్రమలో అయితే ఇది మరీ కష్టం. తిరుగులేని స్థాయిని అందుకున్న వాళ్లు కూడా వరుసగా రెండు మూడు ఫెయిల్యూర్లు పడితే నిస్సహాయులుగా మారిపోతుంటారిక్కడ. ఎంతో ఇమేజ్ ఉన్నవాళ్లే సక్సెస్‌ లను నిలబెట్టుకోవడానికి.. ఫెయిల్యూర్లను తట్టుకోవడానికి కష్టపడిపోతుంటారు. ఇక నిన్నా మొన్నా వచ్చిన యువ కథానాయకుల సంగతెంత? పోయినేడాది ఇదే సమయానికి ‘ఆర్ఎక్స్ 100’ అనే సెన్సేషనల్ హిట్‌ తో గాల్లో తేలిపోతూ ఉన్నాడు కార్తికేయ. అంతకుముందే అతను ‘ప్రేమతో మీ కార్తీక్’ అనే ఓ సినిమా చేశాడు. అది వచ్చింది తెలియదు. వెళ్లింది తెలియదు. కానీ ‘ఆర్ఎక్స్ 100’ అనుకోకుండా చాలా పెద్ద హిట్టయిపోయింది. కుర్రాడికి యూత్‌లో ఓ మోస్తరుగా ఫాలోయింగ్ తెచ్చిపెట్టింది.

ఐతే ఈ సక్సెస్ తర్వాత ఆచితూచి సినిమాలు ఎంచుకోవాల్సిన కార్తికేయ తప్పటడుగులు వేశాడు. తమిళ దర్శక నిర్మాతల్ని నమ్మి ‘హిప్పి’ చేశాడు. అది ఎంత పెద్ద రాంగ్ స్టెప్పో ఈ సినిమా తొలి షో పూర్తయ్యేసరికి అర్థమైపోయింది. ఆ చిత్రానికి బాక్సాఫీస్ దగ్గర దారుణమైన ఫలితం దక్కింది. దీంతో వెంటనే ఇంకో హిట్టు కొట్టకపోతే కార్తికేయ కెరీర్ ప్రమాదంలో పడే పరిస్థితి వచ్చింది. ఈ నేపథ్యంలో ‘గుణ 369’ మీద చాలా ఆశలు పెట్టుకున్నాడు. కానీ నిన్న విడుదలైన ఈ చిత్రం మిశ్రమ స్పందన తెచ్చుకుంటోంది. డివైడ్ టాక్ ఉన్న సినిమాల్ని ఇమేజ్ ఉన్న హీరోలైతే లాగేస్తారు. కానీ కార్తికేయ లాంటి హీరో దాన్ని నిలబెట్టడం కష్టమే అనిపిస్తోంది.

ఇది హిట్టవడం కష్టమని తేలిపోయింది. ఫ్లాప్ అవుతుందా.. యావరేజ్‌ గా నిలుస్తుందా అన్నదే తేలాల్సి ఉంది. తొలి రోజు సాయంత్రానికే సక్సెస్ మీట్ పెట్టి కొంత హడావుడి చేశారు. అంతటితో ఆగకుండా ‘గుణ 369’ దర్శకుడితోనే ఇంకో సినిమా చేయబోతున్నట్లు హడావుడిగా ప్రకటించాడు కార్తికేయ. ఆ దర్శకుడికి ఇంకో ఛాయిస్ లేదని కూడా అన్నాడు. అంతే కాదు.. తమ కాంబినేషన్లో మరో ‘ఎపిక్’ మూవీ రాబోతోందని పెద్ద కామెడీ కూడా చేశాడు. మహేష్ బాబు ‘మహర్షి’ సినిమాకు ‘ఎపిక్’ అని వాడితేనే ప్రేక్షకులకు ఏదోలా అనిపించింది. మరి ‘గుణ 369’ లాంటి సినిమాకు ఈ పదాన్ని ఆపాదిస్తే కామెడీగా అనిపించదూ?