విజ‌య్ పోలీసోడు టైటిల్ మారింది

కోలీవుడ్ ఇళ‌య ద‌ళ‌ప‌తి విజ‌య్ హీరోగా న‌టించిన తెరి సినిమాపై సౌత్ ఇండియాలో భారీ అంచ‌నాలు ఉన్నాయి. రిలీజ్‌కు ముందే రూ.100 కోట్ల ఫ్రీ రిలీజ్ బిజినెస్ చేసిన ఈ సినిమా ఈ రోజు కోలీవుడ్‌లో రిలీజ్ అవుతోంది. రాజా రాణి ఫేం అట్లికుమార్ ద‌ర్శ‌క‌త్వం వ‌హించిన ఈ సినిమాను తెలుగులో టాలీవుడ్ అగ్ర నిర్మాత దిల్ రాజు పోలీసోడు పేరుతో రిలీజ్ చేస్తున్నారు. అయితే ఈ చిత్ర టైటిల్‌ పై వివాదం చెల‌రేగింది. పోలీసోడు టైటిల్ త‌మ‌ను అవ‌మాన‌ప‌రిచేలా ఉందంటూ కొంద‌రు పోలీసులు టైటిల్ మార్చాల‌ని అభ్యంత‌రాలు వ్య‌క్తం చేశారు.

కొన్ని పోలీస్ సంఘాలు దిల్ రాజును కలిసి టైటిల్ మార్చాల‌ని చెప్ప‌డంతో చివ‌ర‌కు దిల్ రాజు ఈ విష‌యాన్ని వెంట‌నే తెరి త‌మిళ్ నిర్మాత క‌లిపులి ఎస్‌.థానుకు వివ‌రించారు. వెంట‌నే థానుతో చ‌ర్చ‌ల అనంత‌రం రాజు పోలీసోడు టైటిల్‌ను పోలీస్‌ గా మారుస్తున్న‌ట్టు ఎనౌన్స్ చేశారు. కొత్త టైటిల్‌ తో పోస్ట‌ర్ కూడా రిలీజ్ చేసేశారు. తెలుగులో సెన్సార్ కంప్లీట్ చేసుకున్న పోలీస్ రేపు రెండు తెలుగు రాష్ర్టాల్లో భారీ ఎత్తున రిలీజ్ అవుతోంది.

ఈ సినిమాకు సెన్సార్ క్లీన్ యు స‌ర్టిఫికేట్ జారీ చేసింది. ఇక విజ‌య్ స‌ర‌స‌న స‌మంత‌ - అమీజాక్స‌న్ హీరోయిన్లుగా న‌టించ‌గా ఈ చిత్రంలో ప్ర‌భు - రాధిక‌ - మ‌హేంద్ర‌న్ ఇత‌ర పాత్ర‌ల్లో న‌టించారు. అల‌నాటి హీరోయిన్ మీనా కుమార్తె కూడా చిన్న పాత్ర‌లో క‌నిపించ‌నుంది. ఈ చిత్రానికి సినిమాటోగ్ర‌ఫీ జార్జి సీ విలియ‌మ్స్‌ - ఎడిట‌ర్ ఆంథోనీ - సంగీతం జీవీ ప్ర‌కాష్‌ కుమార్‌.