చిరునా మ‌జాకా.. ఒక్క డైలాగ్‌తో సీన్ మొత్తం మార్చేశారుగా!?

'ఆచార్య' మూవీతో బిగ్ డిజాస్టర్ ను మూటగట్టుకున్న మెగాస్టార్ చిరంజీవి.. ఇప్పుడు 'గాడ్ ఫాదర్' మూవీతో ప్రేక్షకులను పలకరించేందుకు సిద్ధమవుతున్న సంగతి తెలిసిందే. సిస్ట‌ర్ సెంటిమెంట్ నేప‌థ్యంలో పొలిటిక‌ల్ డ్రామాగా తెర‌కెక్కిన ఈ చిత్రానికి మోహన్ రాజా దర్శకత్వం వ‌హించారు. ఇందులో లేడీ సూపర్ స్టార్ నయనతార, బాలీవుడ్ కండల వీరుడు సల్మాన్ ఖాన్, విలక్షణ నటుడు సత్యదేవ్ తదితరులు కీలక పాత్రలు పోషించారు.

మలయాళంలో సూపర్ డూపర్ హిట్ గా నిలిచిన 'లూసిఫర్' కు రీమేక్ గా ఈ చిత్రాన్ని తెరకెక్కించారు. ఎస్ ఎస్ తమన్ స్వరాలు అందించారు. ఇటీవలే షూటింగ్ కంప్లీట్ చేసుకున్న ఈ చిత్రం దసరా పండుగ కానుకగా అక్టోబర్ 5న రిలీజ్ కాబోతోంది. అయితే విడుదలకు ఇంకా కొద్ది రోజులే స‌మ‌యం ఉన్నా.. ఈ సినిమాపై ఎలాంటి హైప్ క్రియేట్ అవ్వలేదు. అసలు దసరాకు ఈ సినిమా ఉన్నట్లా..? లేనట్లా..? అన్న సందేహాలు సైతం వ్యక్తం అయ్యాయి.

వాస్త‌వానికి చిరంజీవి సినిమా వస్తోందంటే నెల రోజుల ముందు నుంచే హడావుడి వేరె లెవెల్ లో ఉంటుంది. కానీ గాడ్ ఫాదర్ విషయంలో అందుకు భిన్నంగా జరుగుతోంది. మేకర్స్ ఇప్పటివరకు ఎలాంటి ప్రచార కార్యక్రమాలు షురూ చేయలేదు. అసలు ఎక్కడ గాడ్ ఫాద‌ర్‌ ముచ్చట్లే వినిపించడం లేదు. సినిమాలో పెద్ద పెద్ద స్టార్స్ ఉన్నారు. పైగా సూపర్ గుడ్ ఫిల్మ్స్‌, కొణిదెల ప్రొడక్షన్స్ వంటి బ‌డా బ్యాన‌ర్ల‌పై నిర్మిత‌మైన‌ చిత్రమిది. అయినా సరే ఈ సినిమాకు ఎలాంటి బజ్‌ ఏర్పడకపోవడం హాట్ టాపిక్ గా మారింది.

ఈ విషయం పై మెగా అభిమానులు సైతం తీవ్ర అసంతృప్తి వ్యక్తం చేస్తున్నారు. ఇలాంటి తరుణంలో మెగాస్టార్ చిరంజీవి ఒక్క డైలాగ్ తో సీన్ మొత్తాన్ని మార్చేశారు. నిన్న ఆయన ట్విట్టర్ వేదికగా ఓ ఆడియో క్లిప్ ను బయటకు వదిలారు. అందులో ఆయన 'నేను రాజకీయం నుంచి దూరంగా ఉన్నాను కానీ.. రాజకీయం నా నుంచి దూరం కాలేదు' అంటూ చెప్పిన డైలాగ్ ఎంత వైరల్ అయిందో ప్రత్యేకంగా వివరించ‌క్కర్లేదు.

ఇప్పుడీ డైలాగ్ నెట్టింట మార్మోగిపోతోంది. ఈ డైలాగ్ పై రకరకాల చర్చలు జరుగుతున్నాయి. ఇది సినిమాలోని డైలాగ్ అయినప్పటికీ.. చిరంజీవి తన మనసులోని మాటను ఆ డైలాగ్ ద్వారా బయట పెట్టారు అనే చర్చ జరుగుతోంది. పైగా చిరంజీవి రాజకీయాల్లోకి రీ ఎంట్రీ ఇస్తున్నారనే ప్రచారం కూడా ఊపందుకుంది.

ఈ ప్ర‌చారం ఎంత వ‌ర‌కు నిజం అన్న‌ది ప‌క్క‌న పెడితే.. ఎలాంటి ఖర్చు లేకుండా కేవలం ఒక్క డైలాగ్ తో చిరంజీవి తన 'గాడ్ ఫాదర్' సినిమాకు కావాల్సినంత హైప్ క్రియేట్ చేశారు. దీంతో ఇప్పుడు ఈ సినిమా పేరు సినీ వర్గాల్లోనే కాకుండా తెలుగు ప్రేక్షకుల్లో సైతం గట్టిగా వినిపిస్తోంది. ఈ నేపథ్యంలోనే చిరునా మజాకా అంటూ మెగా అభిమానులు ఆయన్ను పొగడ్తలతో ఆకాశానికి ఎత్తేస్తున్నారు.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.