పూజ చేయాలంటే 10 లక్షలు కావాలి

హీరోయిన్ పూజా హెగ్డే తెలుగులో ఇంతకుముందు ముకుంద ఒక లైలా కోసం సినిమాలు చేసింది. మొహెంజొదారా ద్వారా బాలీవుడ్ లోనూ అడుగు పెట్టింది. ఇన్ని సినిమాలు చేసినా రాని పేరు గుర్తింపు జగన్నాథమ్ సినిమాతో వచ్చేశాయి. తనలోని గ్లామర్ మొత్తం గుమ్మరించి పూజా తెలుగు ప్రేక్షకులను ఆకట్టుకుంది. ఈ సినిమాలో పూజా బాగుందన్న పేరు రావడంతో ఒక్కసారిగా చెట్టెక్కి కూర్చుంది. ఇప్పుడు సినిమా చేయాలంటే ఆమె డిమాండ్ చేస్తున్న మొత్తం విని నిర్మాతలు హడలిపోతున్నారు.

ప్రస్తుతం పూజా హెగ్డే ఒక సినిమాకు రూ. కోటిన్నర వరకు డిమాండ్ చేస్తోందనేది ఇండస్ట్రీలో టాక్. ప్రస్తుతం బెల్లంకొండ శ్రీనివాస్ హీరోగా చేస్తున్న సినిమాలో హీరోయిన్ గా నటించేందుకు ఈ మొత్తం ఆమెకు దక్కిందట. దీంతో తన రేంజ్ ఇదే అని ఫీలైపోతోందో ఏమోగానీ నెక్ట్స్ సినిమా కోసం ఎవరు కన్సల్ట్ చేసినా ఇంతేమొత్తం అడుగుతోంది. ఆఖరుకు షాప్ ఓపెనింగ్ ఫంక్షన్ కు కూడా రూ. 10 లక్షలు ఇస్తేనే వస్తానంటోంది. మామూలుగా షాప్ ఓపెనింగ్ అంటే హీరోయిన్లు అరగంట- గంటకు మించి ఉండరు. వచ్చి రిబ్బన్ కటింగ్ చేసి కాసేపు ఫొటోలకు ఫోజులిచ్చి వెళ్లిపోతారు. ఇందుకోసం షాపు యజమానులు రూ. 3 లక్షల నుంచి రూ. 4 లక్షల వరకు ముట్టజెపుతుంటారు. అలాంటిది పూజా అడిగిన మొత్తం విని ఇటీవల ఓ షాప్ ఓనర్ కళ్లు తేలేసి వేరే హీరోయిన్ వెతుక్కున్నాడు.

సాధారణంగా బాలీవుడ్ లో టాప్ హీరోయిన్లు సౌత్ లో నటించడానికి భారీ మొత్తాలే అడుగుతుంటారు. సౌత్ నుంచి వచ్చిన పూజా హెగ్డే వారిని మించిపోవడం చూసి ఇండస్ట్రీ వర్గాలు బిత్తరపోతున్నాయి. ఒక్క హిట్ కే ఈ రేంజిలో చెట్టెక్కడం అవసరమంటావా పూజా..?