బాలీవుడ్ ని ఊపేస్తుందా ఈ బుట్ట బొమ్మ‌

రంగుల ప్ర‌పంచంలో ఎవ‌రి రాత ఎప్పుడు ఎలా మారుతుందో చెప్ప‌లేం. ముందే ఊహించేస్తే దేవుళ్ల‌తో స‌మానం అనుకోవాలి. ఇక ముంబై బొమ్మ పూజా హెగ్డే కెరీర్ ని ప‌రిశీలిస్తే ఈ సంగ‌తి ఇట్టే అర్థ‌మైపోతుంది. `ముకుంద` చిత్రంతో తెలుగు ప‌రిశ్ర‌మ‌కు ప‌రిచ‌య‌మైంది పూజా. ఆ సమయంలో పూజా హెగ్డే టాలీవుడ్ ని ఓ ఊపు ఊపుతుందని ఎవ్వరూ ఊహించి ఉండరు. `మొహెంజోదారో` సమయంలో కూడా బాలీవుడ్‌ వర్గాలు పూజా గురించి పెద్దగా పట్టించుకుని ఉండరు. ఆ సినిమా పరాజయం చెందడంతో దాదాపు అంతా పూజాని మర్చిపోయారనే చెప్పాలి. రెండేళ్ల‌ వరకు పూజాకి ఆఫర్స్ లేవు. దీంతో అంతా త‌న ప‌ని అయిపోయిందని.. కనుమరగయ్యే కథానాయికల జాబితాలో ఈ బ్యూటీ కూడా చేరిపోతుందని అంతా భావించారు. కానీ తాను అలా కాదని నిరూపించింది. ఇటు తెలుగు ప‌రిశ్ర‌మ‌నే కాదు.. బాలీవుడ్ ని కూడా ఊపేస్తానని అప్పుడే బ‌లంగా డిసైడ‌య్యిందో ఏమో.. ఇప్పుడు నిజంగానే ఓ ఊపు ఊపే పనిలో ఉంది.

తెలుగులో ఇప్పుడు టాప్‌ స్టార్స్ అందరికి పూజానే ఫస్ట్ ఆప్షన్‌. ఈ బుట్ట బొమ్మ‌కు ఉన్న క్రేజ్ అంత‌కంత‌కు పెరుగుతోందే కానీ త‌ర‌గ‌లేదు. తెలుగులో ఆమె నటించిన డీజే- మహర్షి- అరవింద సమేత- గద్దలకొండ గణేష్‌- అల వైకుంఠపురములో వరుసగా విజయాలు సాధించడమే అందుకు కారణం. ఈ విజ‌యాల‌తో గోల్డెన్‌ లెగ్ గా పిలిచేస్తున్నారు త‌న‌ను. ప్ర‌స్తుతం కెరీర్ ప‌రంగా క్ష‌ణం తీరిక లేదు. తెలుగులో ప్రభాస్‌ సరసన ఆయన 20వ చిత్రంలో.. అలాగే అఖిల్‌తో `మోస్ట్ ఎలిజిబుల్‌ బ్యాచ్‌లర్‌`లో, ఎన్టీఆర్‌- త్రివిక్రమ్‌ సినిమాలో హీరోయిన్ గా నటించేస్తోంది.

ఇక గతేడాది బాలీవుడ్ లో హౌస్ ఫుల్ 4 తో భారీ హిట్‌ని తన ఖాతాలో వేసుకుంది. తాజాగా మరో బంపర్‌ ఆఫర్ ని అందుకుంది. అక్షయ్‌ కుమార్ తో నటించే లక్కీ ఛాన్స్ మ‌రోసారి పూజాని వరించింది. అక్కీ ప్రస్తుతం అరడజను సినిమాలతో బిజీగా ఉన్నాడు. అందులో ఒకటి `బచ్చన్‌ పాండే`. ఫర్హద్ షామ్జీ దర్శకత్వంలో తెరకెక్కుతున్న ఈ చిత్రంలో ఒక నాయిక‌గా కృతి సనన్ నటిస్తుండగా మ‌రో హీరోయిన్ గా పూజాని ఎంపిక చేశారట. కానీ పూజా పాత్ర హైలైట్ గా ఉంటుందని తెలుస్తోంది. ఒక్క మాటలో చెప్పాలంటే కృతి సనన్ కంటే పూజా హెగ్డే పాత్రకే ఎక్కువ ప్రాధాన్యత ఉంటుందట‌. దీంతో బాలీవుడ్ లో పూజా నెమ్మ‌దిగా పాతుకు పోయే ఛాన్స్ ద‌క్కింద‌న్న టాక్ వినిపిస్తోంది. ఈ మూవీ కూడా వర్కౌట్‌ అయితే త్వరలోనే ఈ బుట్ట‌బొమ్మ‌ బాలీవుడ్ ని కూడా ఓ ఊపు ఊపేస్తుందని బ‌లంగానే చెబుతున్నారు విశ్లేష‌కులు.