#మహేష్25లో పూజ ఏం చేస్తుందంటే..

కథానాయికల కొరత చాలా ఏర్పడిందని బడా ప్రొడక్షన్ కంపెనీల నుండి టాక్ గట్టిగా వినిపిస్తోంది. చిన్న తరహా హీరోలకు ఎక్కువగా కొత్త అమ్మాయిలనే తీసుకుంటున్నారు. ఇక బడా హీరోలకు మాత్రం సక్సెస్ లో ఉన్న హీరోయిన్స్ ను తీసుకోవాలని నిర్మాతలు ప్రయత్నాలు చేస్తున్నారు. అయితే చాలా వరకు ఇప్పుడున్న హీరోయిన్స్ రేంజ్ కొంచెం తగ్గినట్లు టాక్ వస్తోంది. దీంతో ఇటీవల హిట్స్ అందుకున్న ఇద్దరు ముగ్గురు హీరోయిన్స్ వైపే ఎక్కువగా మొగ్గు చూపుతున్నారు.

ప్రస్తుతం స్టార్ హీరోలకు అందుబాటులో ఉండే హీరోయిన్స్ లలో పూజ హెగ్డే నేమ్ టాప్ ప్లేసులో ఉందని చెప్పాలి. గత కొంత కాలంగా ఈ బ్యూటీ ఇమేజ్ చాలా పెరుగుతోంది. దువ్వాడ జగన్నాథమ్ సినిమాతో అలా హిట్టు కొట్టిందో లేదో వరుసగా ఆఫర్స్ అందుకుంటూ లేటెస్ట్ హీరోయిన్స్ కు గట్టి పోటీని ఇస్తోంది. ఆ విషయం పక్కనపెడితే ప్రస్తుతం అమ్మడు మహేష్ బాబు 25వ చిత్రంలో హీరోయిన్ గా నటిస్తున్న సంగతి తెలిసిందే. అలాగే కామెడీ హీరో నరేష్ కూడా మరో ముఖ్య పాత్రలో కనిపించనున్నాడు.

అయితే ఆ సినిమాలో పూజ హెగ్డే పాత్ర గురించి ఒక నిజం తెలిసింది. అందులో ఆమె ఒక వీడియో గేమ్ డెవలపర్ గా సాఫ్ట్ వేర్ లో పనిచేస్తుందట. ఆ క్యారెక్టర్ కి పూజ ఇప్పటికే కొన్ని లుక్స్ ని సెట్ చేసుకున్నట్లు తెలుస్తోంది. మహేష్ తో ఆమె కెమిస్ట్రీ అదిరిపోతుందనే టాక్ వస్తోంది. వంశీ పైడిపల్లి దర్శకత్వం వహిస్తున్న ఈ సినిమాను దిల్ రాజు - సి.అశ్వినీదత్ సంయుక్తంగా నిర్మిస్తున్న సంగతి తెలిసిందే.