బుట్టబొమ్మ.. చిన్న ముక్క లీకు చేసిందే!

స్టైలిష్ స్టార్ అల్లు అర్జున్ నటిస్తున్న ఫ్యామిలీ ఎంటర్టైనర్ 'అల వైకుంఠపురములో' ఈ సంక్రాంతికి ప్రేక్షకుల ముందుకు రానుంది. ఇప్పటికే ఈ సినిమానుండి రిలీజ్ అయిన పాటలు సంగీత ప్రియులను తెగ మెప్పించాయి. నాలుగు పాటలు రిలీజ్ అయితే మూడు పాటలు సూపర్ హిట్లుగా నిలవడం సాధారణ విషయమేమీ కాదు. ఈ సినిమా నుండి రిలీజ్ అయిన నాలుగవ పాట బుట్టబొమ్మ. ఈ పాట ఇన్ స్టెంట్ గా హిట్ అయిన సంగతి తెలిసిందే.

ఈ పాటకు సంబంధించిన మేకింగ్ వీడియోను 'అల వైకుంఠపురములో' హీరోయిన్ పూజా హెగ్డే తన ట్విట్టర్ ఖాతా ద్వారా షేర్ చేసింది. "బుట్టబొమ్మ పాట స్పెషల్ స్నీక్ ఇదే.. ష్.. ఎవరికీ చెప్పకండి" అంటూ ట్వీట్ చేసింది. ఈ పదకొండు సెకన్ల మేకింగ్ వీడియోలో స్టైలిష్ స్టార్ అల్లు అర్జున్.. బ్యూటిఫుల్ పూజ.. ఇతర డ్యాన్సర్లతో కలిసి బుట్టబొమ్మ పాటకు ఓ సూపర్ స్టెప్ వేస్తున్నారు. ఈ పాట చిత్రీకరణ జరుగుతున్న సెట్ కూడా సూపర్ గా ఉంది. ఈ మేకింగ్ వీడియోకు సోషల్ మీడియాలో భారీ స్పందన దక్కుతోంది.

ఈ సినిమాకు థమన్ సంగీత దర్శకుడు. టబు.. జయరామ్.. మురళి శర్మ.. సముద్రకని.. సుశాంత్.. నవదీప్ ఇతర కీలక పాత్రల్లో నటిస్తున్నారు. త్రివిక్రమ్ శ్రీనివాస్ -అల్లు అర్జున్ కాంబినేషన్లో తెరకెక్కుతున్న హ్యాట్రిక్ చిత్రం కావడంతో ఈ సినిమాపై భారీ అంచనాలు ఉన్నాయి. మరి ఈ సినిమా వాటిని ఎంతమేరకు అందుకుంటుందో వేచి చూడాలి.