'పుష్ప'తో చిందులేయనున్న 'జిగేల్ రాణి'...!

స్టైలిష్ డైరెక్టర్ సుకుమార్ తన ప్రతీ సినిమాలో కంపల్సరీగా ఒక ఐటమ్ సాంగ్ ఉండేలా చూసుకుంటూ ఉంటాడు. ఐటమ్ సాంగ్ ఉంటే ఆ సినిమా హిట్టే అనే లెక్కలు వేస్తుంటాడు ఈ లెక్కల మాస్టర్. ఒక్క 'నాన్నకు ప్రేమతో' సినిమాలో తప్ప సుక్కు అన్ని సినిమాలలో ప్రత్యేక గీతం ఉండాల్సిందే. ఆయన లెక్కలకి తగ్గట్టే సినిమా రిజల్ట్ ఎలా ఉన్నా ఐటమ్ సాంగ్ మాత్రం ఓ రేంజ్ లో హిట్ అవుద్ది. ఫస్ట్ సినిమా 'ఆర్య' నుండి సుక్కు లాస్ట్ సినిమా 'రంగస్థలం' వరకూ చూసుకుంటే ఈ విషయం అర్థం అవుతుంది. మొదటి సినిమాలో 'అ అంటే అమలాపురం'.. జగడం సినిమాలో '36 24 36'.. ఆర్య 2 లో 'రింగ రింగా'.. 100% లవ్ లో 'డియాలో డియాలా'.. వన్ నేనొక్కడినే లో 'లండన్ బాబూ లండన్ బాబూ'.. 'రంగస్థలం' సినిమాలో 'జిల్ జిల్ జిగేలు రాణి' సాంగ్స్ ఎంత పాపులర్ అయ్యాయో ప్రత్యేకంగా చెప్పాల్సిన అవసరం లేదు.

ఈ ఐటమ్ సాంగ్స్ కంపోజ్ చేసిన రాక్ స్టార్ దేవిశ్రీ ప్రసాద్ ఇప్పుడు సుకుమార్ - అల్లు అర్జున్ కాంబినేషన్ లో వస్తున్న 'పుష్ప' సినిమాకి మ్యూజిక్ అందిస్తున్నాడు. ఇది వీరి ముగ్గురి కలయికలో రాబోతున్న మూడో సినిమా. అందుకే ఈ సినిమాలో కూడా ఐటమ్ సాంగ్ ఆల్రెడీ అదిరిపోయేలా కొట్టాడంట దేవీశ్రీ. అయితే ఈ ఐటమ్ సాంగ్ లో ఆడిపాడే ఐటమ్ బాంబ్ కోసం వెతుకులాట స్టార్ట్ చేసాడు సుక్కు. డాన్స్ స్కిల్స్ తోపాటు గ్లామర్ కలిగిన బ్యూటీ కోసం ఆయన అనేక పేర్లు పరిశీలిస్తున్నాడట. పాన్ ఇండియా లెవెల్ లో తెరకెక్కుతున్న మూవీ కావడంతో బాలీవుడ్ నుండే ఐటెం బాంబ్ ని దింపే అవకాశముందని వార్తలు వస్తున్నాయి. దీని కోసం పూజాహెగ్డే, మలైకా అరోరా, జాక్వలిన్ ఫెర్నాండేజ్, దిశా పటానీ వంటి బ్యూటీస్ ని అనుకుంటున్నారని గత కొన్ని రోజులుగా రూమర్స్ వస్తున్నాయి. అయితే ఇప్పుడు తాజా సమాచారం ప్రకారం సుక్కు ఈ సినిమాలో 'పుష్ప' పక్కన చిందులేయడానికి 'జిగేల్ రాణి'ని అనుకుంటున్నాడట.

సుకుమార్ గత చిత్రం 'రంగస్థలం'లో చెర్రీ పక్కన స్టెప్పులేసిన పూజాహెగ్డే అయితే సెంటిమెంటుగా కూడా ఉంటుందని లెక్కలు వేస్తున్నాడట. అంతేకాకుండా గతంలో పూజ హెగ్డే బన్నీతో కలిసి 'దువ్వాడ జగన్నాథం' 'అల వైకుంఠపురంలో' చిత్రాలలో రొమాన్స్ చేసింది. ఈ రెండు సినిమాలు మంచి విజయాలను అందుకున్నాయి. ఇప్పుడు ఈ సినిమాలో కూడా కాలు కదిపితే సెంటిమెంట్ వర్క్ అవుద్దని చిత్ర యూనిట్ భావిస్తోందట. అయితే పూజా హెగ్డే ఈ సాంగ్ చేయడానికి ఒప్పుకుంటుందా లేదా అనేది ఇప్పుడు పెద్ద సమస్య. ఎందుకంటే పూజాహెగ్డే ప్రస్తుతం ఫుల్ ఫార్మ్ లో ఉంది. ఇలాంటి టైములో ఐటెం సాంగ్ చేస్తుందా అని డౌట్. అంతేకాకుండా ఒకవేళ ఒప్పుకున్నా డిమాండ్ ఉన్న హీరోయిన్ కాబట్టి ఎంత డిమాండ్ చేస్తుందో అనే ఆలోచన. మొత్తం మీద సుక్కు ఈ ఐటెం సాంగ్ కోసం తెగ ఆలోచిస్తున్నాడట. ఈ సినిమాలో మెయిన్ హీరోయిన్ గా రష్మిక మందన్న నటిస్తోంది. పాన్ ఇండియా మూవీగా తెరకెక్కుతున్న ఈ చిత్రాన్ని తెలుగుతో పాటు త‌మిళ‌ - మ‌ల‌యాళ‌ - క‌న్న‌డ‌ - హిందీ భాష‌ల్లో రిలీజ్ చేయ‌బోతున్నారు. ఈ చిత్రాన్ని మైత్రీ మూవీస్ మరియు ముత్యంశెట్టి మీడియా సంయుక్తంగా నిర్మిస్తున్నారు. ఇప్పటికే ఒక షెడ్యూల్ పూర్తి చేసుకున్న 'పుష్ప' నెక్స్ట్ షెడ్యూల్ లాక్ డౌన్ ఎత్తేసిన వెంటనే స్టార్ట్ కానుంది.