బుట్ట బొమ్మ‌ సుడి మామూలుగా లేదుగా!

అదృష్టం అంటే బుట్ట బొమ్మదే. వ‌ద్దంటే ఆఫ‌ర్లు. కెరీర్ ప‌రంగా క్ష‌ణం తీరిక లేనంత బిజీగా ఉంది. స‌క్సెస్ ఆయాచితంగా దొరికేస్తోంది. ఇంకేం ఉంది? ఇటు టాలీవుడ్ అటు బాలీవుడ్ నుంచి ఆఫ‌ర్ల వెల్లువ అమ్మ‌డిని ఉక్కిరిబిక్కిరి చేసేస్తోంది. తాజాగా పూజా హెగ్డే మ‌రో జాక్ పాట్ కొట్టేసిందని తెలుస్తోంది. ప్ర‌భాస్.. ఎన్టీఆర్.. స‌ల్మాన్.. ఇప్పుడు ఈ రేస్ లో మ‌రో టాప్ స్టార్ పేరు వినిపిస్తోంది.

2020 సంక్రాంతికి `అల వైకుంఠపురములో` చిత్రంతో కెరీర్‌ బెస్ట్ బ్లాక్‌ బస్టర్ ని అందుకుంది పూజా. ప్రస్తుతం ప్రభాస్ తో `జాన్‌` (ప్ర‌భాస్ 20) చిత్రంలో నటిస్తోంది. దీంతో పాటు అఖిల్ స‌ర‌స‌న మోస్ట్ ఎలిజిబుల్ బ్యాచిల‌ర్ చిత్రంలోనూ న‌టిస్తోంది. ఇంత‌లోనే బాలీవుడ్ లో రెండు బంపర్‌ ఆఫర్స్ అందుకుంది. ఈసారి ఏకంగా సల్మాన్ కి జోడీగా ఎంపికైంది. ఫర్హద్‌ సమ్జీ దర్శకత్వంలో రూపొందే `కభీ ఈద్‌ కభీ దివాలీ` చిత్రంలో హీరోయిన్ గా ఎంపికైంది. మరోవైపు అక్షయ్‌ కుమార్ తో గతేడాది `హౌస్‌ఫుల్‌ 4`లో మెరిసిన ఈ బ్యూటీ.. మరోసారి అత‌డితో రొమాన్స్ చేసేందుకు సిద్ధమవుతోంది. ఫర్హద్ షామ్జీ దర్శకత్వంలోనే తెరకెక్కుతోన్న `బచ్చన్‌ పాండే`లోనూ హీరోయిన్ గా సెలక్ట్ చేసినట్టు సమాచారం. అయితే ఇందులో మెయిన్‌ హీరోయిన్ గా కృతి సనన్ నటిస్తుండగా సెకండ్ హీరోయిన్ గా పూజాని ఎంపిక చేశారట. ఈ చిత్రాలతో పూజా బాలీవుడ్ లో క్రేజీ హీరోయిన్‌ కాబోతుందన్న టాక్ వినిపిస్తోంది. తాజా సినిమాల‌న్నీ వర్క‌వుట్‌ అయితే త్వరలోనే బాలీవుడ్ ని కూడా ఓ ఊపు ఊపేస్తుందని చెప్పడంలో అతిశయోక్తి లేదు.

వ‌రుస సినిమాల‌తో ఊప‌రిస‌ల‌ప‌నంత బిజీగా ఉన్న ఈ భామ మ‌రో జాక్ పాట్ కొట్టేసింద‌ని తెలుస్తోంది. తాజాగా ప‌వ‌ర్ స్టార్ పవన్‌ కళ్యాణ్‌ తోనూ పూజా రొమాన్స్ కి సిద్ధమవుతోంద‌ని తెలుస్తోంది. హరీష్‌ శంకర్‌ దర్శకత్వంలో తెరకెక్కబోతున్న చిత్రంలో హీరోయిన్ గా పూజా పేరును పరిశీలిస్తున్నార‌ని ఇదివ‌ర‌కూ వార్త‌లొచ్చాయి. గతంలో హరీష్‌ రూపొందించిన `డీజే`- `గద్దల కొండ గణేష్‌` చిత్రాల్లో పూజా హీరోయిన్ గా మెరిసిన నేప‌థ్యంలో తొలుత గాసిప్పులు వినిపించాయి. దీంతో పూజాతో దర్శకుడు హరీష్ వేవ్‌ లెన్త్ బాగా కుదిరిందని.. పవన్‌ సినిమాకి పూజానే ఎంపిక చేసే ఆలోచనలో ఉన్నాడ‌ని ప్ర‌చార‌మైంది.

అయితే పవన్‌ హీరోగా రూపొందుతున్న `వకీల్‌ సాబ్‌`..లో లేదా క్రిష్‌ దర్శకత్వంలో రూపొందుతున్న నయా చిత్రంలో హీరోయిన్ గా పూజా పేరు వినిపించింది. కానీ అవేవీ నిజాలు కావు. ఇప్పుడు అన్నిర‌కాలుగా క్లారిటీ వ‌చ్చేసింద‌ట‌. హరీష్‌ శంకర్‌ దర్శకత్వంలో తెరకెక్కే చిత్రంలోనే పూజాని ఫైనల్‌ చేసేస్తున్నార‌న్న‌ది తాజా స‌మాచారం. ప‌వ‌న్ న‌టిస్తున్న ప్ర‌స్తుత‌ రెండు సినిమాలు పూర్త‌య్యేప్ప‌టికి పూజాకు కాల్షీట్లు అందుబాటులో ఉన్నాయ‌ట‌. అందుకే ఆ ప్రాజెక్టు పై ఆసక్తిగా ఉన్నట్టు సమాచారం. మరోవైపు ఈ అరవిందను త్రివిక్రమ్‌- ఎన్టీఆర్ చిత్రానికి ఖాయం చేసిన సంగ‌తి తెలిసిందే. ఈ ఆఫ‌ర్ల వెల్లువ చూస్తుంటే.. ఇవన్నీ వర్క‌వుట్‌ అయితే పూజా సుడి మామూలుగా లేదని వేరే చెప్పన‌క్కర్లేదు.