వీరగ్రంథంలో కమల్ హీరోయిన్?

విలక్షణ నటుడు కమల్ హాసన్ నటించి డైరెక్ట్ చేసిన విశ్వరూపం సినిమాతో ఇండస్ట్రీకి పరిచయమైంది పూజాకుమార్. ఆ తరవాత మరోసారి కమల్ సినిమా ఉత్తమ విలన్ లో ఓ డిఫరెంట్ క్యారెక్టర్ చేసింది. ఆ తరవాత ఇండస్ట్రీ ఆమెను గురించి పట్టించుకోలేదు. లేటెస్ట్ గా రాజశేఖర్ హీరోగా నటించిన పి.ఎస్.వి. గరుడవేగ 126.18ఎం సినిమాలో హౌస్ వైఫ్ పాత్రలో బాగా మెప్పించింది.

దీంతో పూజాకుమార్ టాలెంట్ ను ఇండస్ట్రీ గుర్తించింది. లేటెస్ట్ గా కేతిరెడ్డి జగదీశ్వరరెడ్డి తీస్తున్న లక్ష్మీస్ వీరగ్రంథం సినిమాలో లక్ష్మీపార్వతి క్యారెక్టర్ కు పూజాకుమార్ ను ఎంపిక చేసుకున్నారు. ఎన్టీఆర్ జీవితంలోకి లక్ష్మీపార్వతి ఎలా ప్రవేశించిందీ ఈ సినిమా ద్వారా చెప్పబోతున్నామని అంటున్నారు డైరెక్టర్ జగదీశ్వరరెడ్డి. ఇందులో ఎన్టీఆర్ పాత్రను బాలీవుడ్ నటుడు మహేష్ మంజ్రేకర్ తో చేయించాలని అనుకుంటున్నట్లు చెబుతున్నారు. లక్ష్మీ పార్వతి మొదటి భర్త వీరగంధం సుబ్బారావు పాత్రకు తమిళ నటుడు సత్యరాజ్ ను తీసుకోవాలని అనుకుంటున్నారట. ఈ సినిమాకు సంబంధించి షూటింగ్ పనులు అప్పుడే స్టార్ట్ చేశారు.

ఎన్టీఆర్ స్వగ్రామమైన నిమ్మకూరులో లక్ష్మీస్ వీరగ్రంథం సినిమాకు సంబంధించి కొన్ని సీన్లు షూట్ చేయబోతే స్థానికులు అడ్డుకున్నారు. తాము రామ్ గోపాల్ వర్మ తీయబోతున్న లక్ష్మీస్ ఎన్టీఆర్ సినిమా షూట్ చేస్తున్నామని అక్కడి ప్రజలు భావించారని... తర్వాత ఆ ఊరి పెద్దలకు తామెవరో.. తామేం తీయబోతున్నామో వివరించి చెప్పామని జగదీశ్వరెడ్డి చెప్పుకొచ్చారు. ఈ సినిమా ఆపకబోతే తాను ఆత్మహత్య చేసుకుంటానంటూ లక్ష్మీపార్వతి బెదిరించారని.. అయినా తామేం జంకబోమని.. డిసెంబర్ 1 నుంచి సినిమా రెగ్యులర్ షూటింగ్ ప్రారంభమవుతుందని డైరెక్టర్ అంటున్నారు.