డీజే బ్యూటీ అంత పుచ్చుకుంటోందట!

పూజా హెగ్డే తెలుగులో చేసింది తక్కువ సినిమాలే అయినా ఎప్పుడో స్టార్ హీరోయిన్ లీగ్ లోకి చేరిపోయింది. నాగ చైతన్యతో 'ఒక లైలా కోసం'.. వరుణ్ తేజ్ తో 'ముకుంద' సినిమాలు చేసినప్పుడు సాధారణ హీరోయిన్ గానే ఉన్న పూజకు అల్లు అర్జున్ సినిమా 'డీజే దువ్వాడ జగన్నాధం' మంచి బ్రేక్ ఇచ్చింది. అప్పటి నుంచి టాప్ హీరోల సినిమా ఆఫర్లు సాధించి క్రేజీ హీరోయిన్ గా మారింది.

అలాంటి క్రేజ్ ఉంటే ఆటోమేటిక్ గా రెమ్యూనరేషన్ కూడా పెరుగుతుంది కదా.. ఇప్పుడు అదే జరిగింది. పూజా ప్రస్తుతం మహేష్ బాబు 'మహర్షి'.. ప్రభాస్ - రాధాకృష్ణ కుమార్ సినిమాలో కూడా హీరోయిన్ గా నటిస్తోందన్న సంగతి తెలిసిందే. తాజా సమాచారం ప్రకారం 'మహర్షి' సినిమాలో నటించినందుకు రూ. 1.75 కోట్లు తీసుకుందట. ఈ రేంజ్ రెమ్యూనరేషన్ టాప్ లీగ్ హీరోయిన్లకు మాత్రమే ఇస్తారు. ఒకవేళ ఈ సినిమాలు హిట్ అయితే రెమ్యూనరేషన్ ను మరింతగా పెరిగే అవకాశం ఉందని అంటున్నారు.

తెలుగులోనే కాకుండా హిందీలో కూడా క్రేజీ ప్రాజెక్టును లైన్లో పెట్టింది. అక్షయ్ కుమార్ ప్రధానపాత్రలో నటిస్తున్న 'హౌస్ ఫుల్ 4' లో పూజ హీరోయిన్ గా నటిస్తోంది. ఈ సినిమా ఏప్రిల్ 5 న ప్రేక్షకుల ముందుకు రానుంది. పూజా బాలీవుడ్ లోకి 'మొహెంజో దారో' తో ఎంట్రీ ఇచ్చింది కానీ అది డిజాస్టర్ కావడంతో బాలీవుడ్ జర్నీకి బ్రేక్ పడింది. ఇప్పుడు 'హౌస్ ఫుల్ 4' సినిమా తనకు సక్సెస్ తీసుకొస్తుందని ఆశలు పెట్టుకుంది ఈ భామ. ఈ సినిమా కూడా హిట్ అయితే బాలీవుడ్ లో కూడా పూజ జెండా పాతేయడం ఖాయమే.