అవును .. ఆమెకు ఆ ఇద్ద‌రితో దోస్తానా!!

`అవును` చిత్రంతో మ‌ల‌యాళ కుట్టి పూర్ణ‌కు టాలీవుడ్‌ లో బోలెడంత పాపులారిటీ వ‌చ్చిన సంగ‌తి తెలిసిందే. ఆ సినిమాకు ముందే అల్ల‌రి న‌రేష్ స‌ర‌స‌న `సీమ‌ట‌పాకాయ్` చిత్రంతో ఘ‌న‌మైన ఆరంగేట్రమే చేసింది. ఆ త‌ర్వాత అల్ల‌రోడితోనే ఓ మూడు చిత్రాల్లోనూ న‌టించి గుర్తింపు తెచ్చుకుంది. గ‌త కొన్నేళ్లుగా `అవును` ఫ్రాంఛైజీ స్టార్‌ గా ర‌విబాబు కాంపౌండ్‌ లోనే వ‌రుస‌గా సినిమాలు చేస్తోంది. అలాగే పూర్ణ న‌టించే ప్ర‌తి సినిమాకి అగ్ర‌నిర్మాత డి.సురేష్‌ బాబు అండ‌దండ‌లు ఉన్నాయి. ర‌విబాబు- సురేష్‌ బాబు దోస్తానా ఫ్రెండ్ షిప్ ఇటు పూర్ణ కెరీర్‌ కి పెద్ద ప్ల‌స్ అవుతోంది. వ‌రుస‌గా ఒక‌దాని త‌ర్వాత ఒక‌టిగా సినిమాల‌కు సంత‌కాలు చేసేందుకు పూర్ణ‌కు అవ‌కాశం ద‌క్కుతోంది.

ఇటీవ‌లే రిలీజైన `అదుగో` (ర‌విబాబు-డి.సురేష్‌ బాబు) చిత్రం ఫ్లాపైనా - అందులో పూర్ణ స్పెష‌ల్ సాంగ్ మాత్రం అభిమానుల్ని మెప్పించింది. రవిబాబు ఏరికోరి పూర్ణ‌తో స్పెష‌ల్‌ గా ఈ పాట‌ను చిత్రీక‌రించాడు. ఓ ర‌కంగా పూర్ణ‌ను ఆ కాంపౌండ్ విడిచిపెట్ట‌కుండా అవ‌కాశాలు ఇవ్వ‌డం త‌న‌కు పెద్ద ప్ల‌స్ అవుతోంది. క్యూట్ - చ‌బ్బీగాళ్ పూర్ణ‌కు యువ‌త‌రంలో ఉన్న ఫాలోయింగ్ ఇటు చిన్న స్థాయి సినిమాలకు క‌లిసొస్తోంది. ఇక‌పోతే పూర్ణ గ‌త ఏడాది గుండు కొట్టించుకుని మ‌రీ `కోడి వీర‌న్` అనే త‌మిళ‌ సినిమా కోసం ప్ర‌యోగం చేసింది. ఆ సినిమా చ‌క్క‌ని ఐడెంటిటీ తెచ్చింది. అందులో నాయికా ప్ర‌ధాన పాత్ర‌తో మెప్పించింది. `నా దారి అంద‌రి దారి కాదు` అని ఈ అమ్మ‌డు కొత్త‌దారిలో వెళుతూ ఆక‌ట్టుకుంటోంది.

తాజా స‌మాచారం ప్ర‌కారం.. పూర్ణ మ‌రో ప్ర‌యోగాత్మ‌క చిత్రంలో న‌టిస్తోంది. రెగ్యుల‌ర్ కామెడీ - క‌మ‌ర్షియ‌ల్ ఎలిమెంట్స్ ఉన్నా పూర్ణ పాత్ర‌లో ఉండే ట్విస్టులు ఈ చిత్రంలో ఆద్యంతం మైమ‌రిపిస్తాయిట‌. ఈరోజు హైద‌రాబాద్ రామానాయుడు స్టూడియోస్‌ లో ఈ సినిమా ప్రారంభ‌మైంది. సీనియ‌ర్ మాట‌ల ర‌చ‌యిత మ‌రుధూరి రాజా క్లాప్ కొట్టి సినిమాని ప్రారంభించారు. ఆయ‌న ఆశీస్సుల‌తో ఆయ‌న వ‌ద్ద ప‌ని చేసిన శిష్యుల బృందం ఈ చిత్రాన్ని నిర్మిస్తోంది. ఇక డి.సురేష్ బాబు పూర్ణ సినిమాని పూజా కార్య‌క్ర‌మాల వేళ ఆశీర్వ‌దించారు. ఈ సినిమాకి ప‌ని చేసే ద‌ర్శ‌క‌నిర్మాత‌లంద‌రి పేర్ల‌లో కృష్ణ కామ‌న్ అట‌. అన్నం చిన్నికృష్ణ ద‌ర్శ‌క‌త్వం వ‌హిస్తున్నారు. భీమ్స్ సంగీతం అందిస్తున్నారు. పూర్ణ తాజా ప్ర‌యోగం ఏంటో? అది త‌న కెరీర్‌ కి ఎంత‌వ‌ర‌కూ క‌లిసొస్తుందో కాస్త‌ వేచి చూడాల్సిందే.