మెగా సీరియల్ లో ఛాన్స్ పట్టిన పూనం

డజనుకు పైగా సినిమాల్లో ఓ అమ్మాయి హీరోయిన్ గా నటించేసిన తర్వాత.. బోలెడంత క్రేజ్ వచ్చేసి ఉండాలి. పూనమ్ కౌర్ హైద్రాబాద్ లో పుట్టిన భామే. కాకపోతే ఢిల్లీలో చదువుకున్న ఈ బ్యూటీని.. దర్శకుడు తేజ సినిమాల్లోకి తెచ్చినా.. ఈయన తీసిన ఒక విచిత్రం కంటే ముందే మాయాజాలం చేసేసి ముందుగా థియేటర్లలోకి వచ్చింది పూనమ్ కౌర్.

ఇదంతా ఫ్లాష్ బ్యాక్ అయితే.. ఈమె చివరగా నాయకి మూవీతో ఆన్ టాలీవుడ్ స్క్రీన్ పై కనిపించింది. కానీ రీసెంట్ గా పవన్ కళ్యాణ్ - కత్తి మహేష్ వివాదంలో మధ్యలో తల దూర్చి బాగానే మాటలు పడింది. ఇప్పుడీ భామకు ఓ బ్రహ్మాండమైన ఆఫర్ వచ్చిందని తెలుస్తోంది. కాకపోతే ఇది సిల్వర్ స్క్రీన్ మీద కాదు లెండి. స్మాల్ స్క్రీన్ మీద.. అంతే తేడా. ప్రస్తుతం భారీ స్థాయిలో తీసే సీరియల్స్ కు హైప్ బాగానే ఉంటోంది. అలాగే ఓ తెలుగు ఛానల్ స్వర్ణ ఖడ్గం పేరుతో మెగా సీరియల్ రాబోతున్నట్లు టీజర్ ను విడుదల చేసింది.

ఇందులో హీరోయిన్ పేరు చెప్పకపోయినా.. ఇప్పటికే ఇండస్ట్రీ జనాలకు ఈ సీరియల్ లో హీరోయిన్ గా నటిస్తున్నది పూనమ్ కౌర్ అనే విషయం తెలుసు. ఆ టీజర్ గట్రా చూస్తుంటే అరుంధతి టైపులో పెద్ద ఖడ్గాన్ని చూపించారు. థీమ్ ఏంటో చెప్పకపోయినా.. ఈ టైటిల్ డిజైన్ ప్రకారం ఫ్యాంటసీ జోనర్ లో తీస్తున్నారనే విషయం అర్ధమవుతోంది. మరి బుల్లి తెర ప్రేక్షకులను పూనమ్ కౌర్ ఏ మేరకు మెప్పించగలుగుతుందో చూడాలి.

టీజర్ చూడటానికి క్లిక్ చేయండి