శిరీష్ హడావిడి వినిపించట్లేదే!?

ప్రస్తుతం టాలీవుడ్ అంతా పవన్ కళ్యాణ్ అజ్ఞాతవాసి చిత్రం కోసం తెగ వెయిటింగ్ చేస్తోంది. అయితే.. అది సంక్రాంతికి వచ్చే సినిమా. ఈలోపు బాక్సాఫీస్ ను కళకళలాడించే సినిమాలుగా క్రిస్మస్ కి వస్తున్న మూవీస్ పై అంచనాలు ఉన్నాయి. నాని నటించిన ఎంసీఏ.. అఖిల్ హీరోగా రూపొందిన హలో చిత్రాలపై ఎక్స్ పెక్టేషన్స్ బాగానే ఉన్నాయి.

అయితే.. వీటితో పోటీగా అల్లు శిరీష్ నటించిన ఒక్క క్షణం కూడా విడుదల కావాల్సి ఉంది. కానీ థియేటర్స్ ప్రాబ్లెం కాకుండా ఒక వారం వెనక్కు వెళ్లిందీ చిత్రం. కానీ ప్రస్తుతం ఎంసీఏ.. హలో చిత్రాల హంగామా బాగా ఎక్కువగానే ఉంది. విడుదలకు మరో 10 రోజుల గ్యాప్ కూడా లేకపోవడంతో ప్రమోషన్స్ కూడా హై లెవెల్ లోనే చేస్తున్నారు. ఈ హంగామాలో శిరీష్ సినిమా సంగతులు అసలేవీ వినిపించడం లేదు. పైగా క్రేజీ ప్రాజెక్టుల మధ్యలో ఒక్క క్షణంకు ప్రమోషనల్ యాక్టివిటీస్ చేపట్టినా.. అంతగా ఉపయోగం ఉండదని భావిస్తున్నారట మేకర్స్.

అందుకే ఉద్దేశ్యపూర్వకంగానే కాస్త నెమ్మదించారని.. క్రిస్మస్ సినిమాలు విడుదల కాగానే వీఐ ఆనంద్ దర్శకత్వంలో రూపొందిన ఒక్క క్షణంకు ఫుల్ పేస్ లో ప్రమోషన్ చేయాలని డిసైడ్ అయ్యారని తెలుస్తోంది. గతంలో ఎక్కడకు పోతావు చిన్నవాడా మూవీని తెరకెక్కించిన దర్శకుడు కావడంతో.. ఇండస్ట్రీలో కూడా ఒక్క క్షణంపై ఎక్స్ పెక్టేషన్స్ బాగానే ఉన్నాయి.