టైగ‌ర్ కోసం పాపుల‌ర్ మోడ‌ల్

మాస్ మ‌హారాజా ర‌వితేజ జోరు పెంచేశారు. 'ఖిలాడీ' మూవీ రిలీజ్ త‌రువాత బ్యాక్ టు బ్యాక్ మూవీస్ ని సెట్స్ పైకి తీసుకెళ్లారు. ఈ ఉగాది సంద‌ర్భంగా మ‌రో మూవీని ప‌ట్టాలెక్కించ‌బోతున్నారు. య‌దార్థ సంఘ‌ట‌న‌ల ఆధారంగా ర‌వితేజ హీరోగా రూపొందుతున్న చిత్రం 'టైగ‌ర్ నాగేశ్వ‌ర‌రావు'. స్టూవ‌ర్టు పురం బందిపోటు దొంగ‌గా పాపుల‌ర్ అయిన వ్య‌క్తి జీవిత క‌థ ఆధారంగా ఈ చిత్రాన్ని తెర‌కెక్కిస్తున్నారు. వంశీ ద‌ర్శ‌కుడిగా ప‌రిచ‌యం అవుతున్న ఈ మూవీని ఉగాది సంద‌ర్భంగా లాంఛ‌నంగా చిత్ర బృందం ప్రారంభించ‌బోతోంది.

ఇందులో ర‌వితేజ రాబిన్ హుడ్ త‌ర‌హాలో సాగే రియ‌ల్ క్యారెక్ట‌ర్ టైగ‌ర్ నాగేశ్వ‌ర‌రావు గా క‌నిపించ‌బోతున్నారు. ఇందులో ఆయ‌న‌కు జోడీగా ఇద్ద‌రు హీరోయిన్ లు న‌టించ‌నున్నారు. ప్ర‌ధాన హీరోయిన్ గా బాలీవుడ్ హీరోయిన్ క్రితిస‌న‌న్ సోద‌రి నుపూర్ స‌స‌న్ న‌టించ‌బోతోంది. గురువారం ఈ విష‌యాన్ని ప్ర‌క‌టించిన చిత్ర బృందం తాజాగా శుక్ర‌వారం మ‌రో హీరోయిన్ ని అధికారికంగా ప్ర‌క‌టించారు. పాపుల‌ర్ మోడ‌ల్‌, న‌టి గాయ‌త్రీ భ‌ర‌ద్వాజ్ ఇందులో సెకండ్ హీరోయిన్ గా క‌నిపించ‌బోతోంది.

2018 క‌ల‌ర్స్ మిస్ ఫెమినా మిస్ ఇండియాగా టైటిల్ ని సొంతం చేసుకున్న గాయ‌త్రీ భార్గ‌వి ప‌లు క‌మ‌ర్షియ‌ల్ యాడ్స్ లోనూ న‌టించి పాపుల‌ర్ గా మారింది. అలాగే ఫేమ‌స్ వెబ్ సిరీస్ 'ధిన్ డోరా' తో నటిగా ఎంట్రీ ఇచ్చి మంచి పేరు తెచ్చుకుంది. ఇలా సుపూర్ స‌స‌న్‌, గాయ‌త్రీ భార్గ‌వి వంటి ఉత్త‌రాది భామ‌లు 'టైగ‌ర్ నాగేశ్వ‌ర‌రావు' చిత్రానికి యాడ్ కావ‌డంతో హిందీలోనూ ఈ చిత్రానికి క్రేజ్ ఏర్ప‌డే అవ‌కాశాలు వున్నాయ‌ని, ఆ కార‌ణంగానే ఈ ఇద్దరు భామ‌ల‌ని చిత్ర బృందం ఫైన‌ల్ చేసుకుంద‌ని చెబుతున్నారు.

ఇక వాస్త‌విక సంఘ‌ట‌న‌ల ఆధారంగా యాక్ష‌న్ ఎంట‌ర్ టైన‌ర్ గా రూపొంద‌నున్న ఈ మూవీని అత్యంత భారీ బ‌డ్జెట్ తో పాన్ ఇండాయా స్థాయిలో నిర్మించ‌బోతున్నారు. రీసెంట్ గా విడుద‌లై దేశ వ్యాప్తంగా సంచ‌ల‌నం సృష్టిస్తున్న 'ది క‌శ్మీర్ ఫైల్స్' చిత్ర నిర్మాత‌ల్లో ఒక‌రైన అభిషేక్ అగ‌ర్వాల్ అభిషేక్ అగ‌ర్వాల్ ఆర్ట్స్ బ్యాన‌ర్ పై ఈ మూవీని నిర్మించ‌బోతున్నారు.

ఉగాది సంద‌ర్భంగా హైద‌రాబాద్ లో మాదాపూర్ లోని హెచ్ ఐ సీసీలో ఈ చిత్రాన్ని భారీ స్థాయిలో లాంచ్ చేయ‌బోతున్నారు. ఇదే ఈ వెంట్ లో ర‌వితేజ ప్రీ లుక్ ని కూడా విడుదల చేస్తున్నారు.

పాన్ ఇండియా స్థాయిలో తెలుగు, త‌మిళ‌, మ‌ల‌యాళ‌, క‌న్న‌డ‌, హిందీ భాష‌ల్లో ఈ మూవీ అత్యంత భారీ స్థాయిలో విడుద‌ల కానుంది. జీవీ ప్ర‌కాష్ కుమార్ సంగీతం, శ్రీ‌కాంత్ విస్సా డైలాగ్స్‌, ఛాయాగ్ర‌హ‌ణం ఆర్ మ‌ధి, ప్రొడ‌క్ష‌న్ డిజైన‌ర్ అవినాష్ కొల్ల‌.