బాస్ పార్టీ సెట్ లో వీరయ్యతో వీరమల్లు ముచ్చట్లు..!

మెగాస్టార్ చిరంజీవి హీరోగా నటిస్తున్న లేటెస్ట్ మాస్ యాక్షన్ ఎంటర్టైనర్ "వాల్తేరు వీరయ్య". రవీంద్ర కొల్లి (బాబీ) దర్శకత్వంలో తెరకెక్కుతున్న ఈ సినిమా షూటింగ్ చివరి దశకు చేరుకుంది. ఈ నేపథ్యంలో ఫస్ట్ సింగిల్ తో మ్యూజికల్ ప్రమోషన్స్ మొదలు పెట్టడానికి మేకర్స్ రెడీ అయ్యారు.

'వాల్తేరు వీరయ్య' నుంచి రాక్ స్టార్ దేవిశ్రీ ప్రసాద్ కంపోజ్ చేసిన 'బాస్ పార్టీ' అనే సాంగ్ ని రేపు అక్టోబర్ 23 సాయంత్రం 4.05 గంటలకు విడుదల చేయనున్నారు. అంతకంటే ముందుగా ఈరోజు మంగళవారం సాంగ్ ప్రోమోని రిలీజ్ చేశారు.

అయితే 'బాస్ పార్టీ' సాంగ్ ను ఇప్పటికే చిరంజీవి సోదరుడు పవర్ స్టార్ పవన్ కళ్యాణ్ వీక్షించి అభినందించినట్లుగా చిత్ర బృందం తెలిపింది. ఈ పాట చిత్రీకరణ జరుగుతున్నప్పుడు 'హరి హర వీరమల్లు' దర్శక నిర్మాతలతో కలిసి పవన్ ‘వాల్తేరు వీరయ్య’ సెట్స్ ను సందర్శించారు.

'బాస్ పార్టీ' సాంగ్ ని తమ్ముడు పవన్‌ కల్యాణ్ కు చిరంజీవి స్వయంగా ల్యాప్ టాప్ లో చూపించారు. అన్నయ్యతో కలిసి ఈ పాటను ఆస్వాదించిన పవన్.. చిరు స్టెప్పులను చూసి మురిసిపోయారు. పవర్ స్టార్ కు ఈ పాట ఎంతో బాగా నచ్చిందని.. తనను అభినందించారని దర్శకుడు బాబీ ట్విట్టర్ లో తెలిపారు.

'వాల్తేరు వీరయ్య' సెట్‌ లో పవన్‌ కల్యాణ్‌ సందడి చేసిన ఫొటోలను మేకర్స్ సోషల్ మీడియాలో షేర్ చేశారు. ఇందులో చిరంజీవి - పవన్ లలో పాటుగా దర్శకుడు క్రిష్ మరియు నిర్మాత ఏఎం రత్నం కూడా కనిపిస్తున్నారు. వీరయ్యతో వీరమల్లు ముచ్చటిస్తున్న ఈ ఫోటోలు ప్రస్తుతం నెట్టింట వైరల్‌ అవుతున్నాయి. ఇంతకముందు ఆచార్య మరియు గాడ్ ఫాదర్ సెట్స్ కు కూడా పవన్ వెళ్ళిన సంగతి తెలిసిందే.

కాగా, 'వాల్తేరు వీరయ్య' సినిమాలో చిరు సరసన శృతి హాసన్ హీరోయిన్ గా నటిస్తోంది. మాస్ మహారాజా రవితేజ కీలక పాత్ర పోషిస్తుండగా.. ఆయనకు జోడీగా క్యాథరిన్ కనిపించనుంది. బాస్ పార్టీ సాంగ్ లో బాలీవుడ్ బ్యూటీ ఊర్వశీ రౌతేలా ఆడి పాడింది. సంగీత దర్శకుడు దేవిశ్రీ ప్రసాద్ ఈ పాటకు లిరిక్స్ రాయడమే కాదు.. నకాశ్ అజీజ్ - హరిప్రియా లలో కలిసి ఆలపించారు. శేఖర్ మాస్టర్ కొరియోగ్రఫీ చేశారు.

రేపు రిలీజ్ కాబోతున్న ఈ పాట కోసం ఎంతో ఆసక్తిగా ఎదురుచూస్తున్నానని ట్వీట్ చేసిన చిరంజీవి.. సాంగ్ కోసం వేసిన సెట్స్ - లొకేషన్‌ షూటింగ్ స్టిల్స్‌ ను పంచుకున్నారు. ఆర్ట్‌ డైరెక్టర్ ఏఎస్‌ ప్రకాశ్‌ మరియు సినిమాటోగ్రాఫర్ ఆర్థర్ విల్సన్ లను ప్రత్యేకంగా అభినందించారు.

మైత్రీ మూవీ మేకర్స్‌ బ్యానర్ ఫై నవీన్ యెర్నేని - రవి శంకర్ భారీ బడ్జెట్ తో ఈ చిత్రాన్ని నిర్మిస్తున్నారు. 2023 సంక్రాంతి కానుకగా జనవరి రెండో వారంలో "వాల్తేరు వీరయ్య" చిత్రం గ్రాండ్ గా ప్రేక్షకుల ముందుకు రానుంది.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.