నెక్ట్స్ నువ్వే.. ఏంటో అంత ధీమా??

చాలాకాలంగా దర్శకుడు కావాలంటూ ఎదురుచూసిన టివి యాంకర్, నటుడు మరియు దర్శకుడు అయిన ప్రభాకర్.. ఎట్టకేలకు గీతా ఆర్ట్స్ క్యాంపులోనే డైరక్టర్ అయ్యాడు. ఏకంగా నలుగురు పార్టనర్లు కలసి నిర్మిస్తున్న సినిమాకు ప్రభాకర్ డైరక్టర్. అయితే ఈ సినిమాను చడీచప్పుడు కాకుండా షూటింగ్ కూడా పూర్తి చేసేసి.. ఇప్పుడు ఏకంగా రిలీజ్ కు కూడా రెడీ చేస్తున్నారు. అదీ కాకుండా దసరా బరిలో ఏకంగా పెద్ద సినిమాలను టార్గెట్ చేస్తూ మధ్యలో దించుతున్నారు.

టాలీవుడ్ లో బడా నిర్మాణ సంస్ధలుగా పేరొందిన యు.వి.క్రియెషన్స్,గీతాఆర్ట్స్ 2 తమిళ నిర్మాణ దిగ్గజం స్టూడియో గ్రీన్ ప్రొడకన్స్ తో కలిసి వి4 మూవీస్ అనే బ్యానర్ స్టార్ట్ చేసి.. ప్రభాకర్ డైరక్షన్లో నెక్ట్స్ నువ్వే సినిమాను తీశారు. ఈ సినిమాలో వైభవి అనే కొత్తమ్మాయితో పాటు యాంకర్ రష్మి హీరోయిన్లుగా చేస్తున్నారు. ఈ సినిమా మొత్తం షూటింగ్ పూర్తి చేసేసి ఇప్పుడు పోస్ట్ ప్రొడక్షన్ వర్కులో ఉందట. అయితే ఈ సినిమాను ఇప్పుడు దసరా రేసులో సెప్టెంబర్ విడుదల టార్గెట్ చేస్తున్నారు. ఆల్రెడీ ఎన్టీఆర్ జై లవ కుశ.. మహేష్‌ బాబు స్పైడర్ సినిమాలు ధియేటర్లను తినేసే టైములో వీళ్లు సినిమాను ఎలా ప్లేస్ చేస్తారా అని ఇప్పుడు ట్రేడ్ వర్గాలు ఆసక్తిగా చూస్తున్నాయి.

గీతా ఆర్ట్స్ అండదండలు ఉండటంతో ధియేటర్లు దొరికేస్తాయి కాని.. అసలు ప్రభాకర్ ముందుగా తన టీజర్ అండ్ ట్రైలర్ తో బజ్ క్రియేట్ చేయకుండా ఇలా అప్పుడే రిలీజ్ డేట్లను లాక్ చేసుకోవడమే కాస్త కొత్తగా ఉంది. ఒకవేళ వీరు ప్రొడక్ట్ పైన అంత కాన్ఫిడెంట్ గా ఉన్నారనే అనుకుందాం.. అలాగైతే ముందు టీజర్ తో వచ్చి ఇంప్రెస్ చెయ్యండి గురూ. నిన్నే ఈ సినిమా ఫస్ట్ లుక్ విడుదలవ్వగా.. ఇప్పుడు తరువాత ఏంటనే అందరూ ఎదురు చూస్తున్నారు.