హ‌మ్మ‌య్య! వెయిటింగ్ ఫ‌లించి..!

హ‌మ్మ‌య్య‌! మూడేళ్ల నిరీక్ష‌ణ ఫ‌లిస్తోంది. యువ‌ ద‌ర్శ‌కుడు రాధాకృష్ణ ముఖంలో ఆనందం తాండ‌వించే స‌మ‌యం ఆస‌న్న‌మైంద‌ని తెలుస్తోంది. ఇన్నాళ్లు త‌న‌ని వెయిట్ చేయించిన ప్ర‌భాస్ ఎట్ట‌కేల‌కు ముహూర్తం ఫిక్స్ చేసుకోమ‌ని చెప్పేశాడ‌ట‌. సెప్టెంబ‌ర్ 6న ప్ర‌భాస్ 20వ సినిమాకి ఠెంకాయ కొట్టేయ‌నున్నార‌ని తెలుస్తోంది. ఆ మేర‌కు జిల్ రాధాకృష్ణ త‌న సినిమా ప్రారంభోత్స‌వం కోసం ప్రిప‌రేష‌న్‌ లో ఉన్నార‌ని చెబుతున్నారు.

2015లో `జిల్` సినిమా రిలీజైతే - ఆ త‌ర్వాత క‌థ ఓకే చేసిన ప్ర‌భాస్ మూడేళ్ల పాటు వెయిట్ చేయించ‌డంపై ఆస‌క్తిక‌ర చ‌ర్చ సాగింది. అయితేనేం ఈ వెయిటింగ్ ఫ‌లించి `సాహో` హీరోనే డైరెక్ట్ చేసే అవ‌కాశం ఛేజిక్కించుకున్నాడన్న చ‌ర్చా సాగుతోంది. `సాహో` ప్ర‌భాస్ కెరీర్ 19వ సినిమా. బాహుబ‌లి సిరీస్ త‌ర్వాత ఎంతో ప్ర‌తిష్ఠాత్మ‌కంగా భావించి సాహో లాంటి భారీ యాక్ష‌న్ చిత్రంలో ప్ర‌భాస్ న‌టిస్తున్నాడు. అందుకోసం రాజీలేని షెడ్యూల్స్‌ తో త‌ల‌మున‌క‌లుగా ఉన్నాడు. ఆ క్ర‌మంలోనే రాధాకృష్ణ ఇన్నాళ్లు వేచి చూడాల్సొచ్చింది. మొత్తానికి లాంచ్‌ చేసేస్తున్నారు కాబ‌ట్టి, త‌దుప‌రి సాహో చిత్రీక‌ర‌ణ పూర్త‌వ్వ‌గానే రెగ్యుల‌ర్ చిత్రీక‌ర‌ణ ఉంటుంద‌ని భావిస్తున్నారు.

అయితే ఈ సినిమా రెగ్యుల‌ర్ చిత్రీక‌ర‌ణ విష‌య‌మై చిత్ర‌యూనిట్ ఇంకా క్లారిటీ ఇవ్వాల్సి ఉంది. ఈ చిత్రాన్ని యు.వి.క్రియేష‌న్స్‌ తో క‌లిసి గోపి కృష్ణ మూవీస్ ప‌తాకంపై కృష్ణంరాజు స్వ‌యంగా నిర్మిస్తున్నారు. యూర‌ప్‌ లోని అరుదైన లొకేష‌న్ల‌లో తెర‌కెక్కించేందుకు రెడీ అవుతున్నారు. ప్ర‌భాస్ స‌ర‌స‌న పూజా హెగ్డే క‌థానాయిక‌. ఇదో చ‌క్క‌ని ప్రేమ‌క‌థా చిత్ర‌మ‌ని తెలుస్తోంది.