సుధీర్ బాబు ‘శ్రీదేవి సోడా సెంటర్’ సినిమాకు పాన్ ఇండియన్ స్టార్ ప్రభాస్ సపోర్ట్..

సుధీర్ బాబు, ఆనంది జంటగా నటిస్తున్న శ్రీదేవి సోడా సెంటర్ సినిమాపై అంచనాలు భారీగా ఉన్నాయి. ఈ సినిమా ప్రమోషన్ కార్యక్రమాలు కూడా జోరందుకున్నాయి. ఆగస్ట్ 27న సినిమా విడుదల కానుంది. ఆ లోపే సినిమా యూనిట్‌కు అద్భుతమైన బూస్టప్ లభించింది. ఈ సినిమాకు పాన్ ఇండియన్ స్టార్ ప్రభాస్ అండదండగా ఉన్నాడు. ఈ సినిమా యూనిట్‌ను ప్రత్యేకంగా కలిసి తన బెస్ట్ విషెస్ తెలిపారు ప్రభాస్. శ్రీదేవి సోడా సెంటర్ కచ్చితంగా పెద్ద విజయం సాధిస్తుందని చెప్పారు ప్రభాస్. పలాస 1978 ఫేమ్ కరుణ కుమార్ దర్శకత్వంలో 70mm ఎంటర్టైన్మెంట్ పతాకంపై విజయ్ చిల్లా, శశి దేవిరెడ్డి ఈ సినిమాను నిర్మిస్తున్నారు. ఇప్పటికే విడుదలైన పోస్టర్స్, టీజర్స్ అన్నీ శ్రీదేవి సోడా సెంటర్ సినిమాపై ఆసక్తితో పాటు అంచనాలను కూడా పెంచేసాయి. ఈ సినిమాకు అదిరిపోయే ప్రీ రిలీజ్ బిజినెస్ జరిగింది.

ఇండియా వ్యాప్తంగా శ్రీదేవి సోడా సెంటర్ సినిమాకు చాలా మంచి బిజినెస్ జరిగింది. ఈ సినిమా థియెట్రికల్ రైట్స్ 12 కోట్లకు అమ్ముడయ్యాయి. సీనియర్ నిర్మాత, డిస్ట్రిబ్యూటర్, బ్రిడ్జ్ ఎంటర్‌టైన్మెంట్స్ అధినేత లక్ష్మణ్ శ్రీదేవి సోడా సెంటర్ హక్కులను సొంతం చేసుకున్నారు. కరోనా సెకండ్ వేవ్ తర్వాత విడుదలవుతున్న శ్రీదేవి సోడా సెంటర్ సినిమాను వీలైనంత వరకు భారీగా విడుదల చేయబోతున్నారు. ఈయన ఈ మధ్యే విడుదలై బ్లాక్‌బస్టర్ అయిన జాతి రత్నాలు సినిమాను లక్ష్మణ్ గారు డిస్ట్రిబ్యూట్ చేసారు. శ్యామ్ దత్ సైనుద్దీన్ సినిమాటోగ్రఫీ అందిస్తున్న ఈ సినిమాకి శ్రీకర్ ప్రసాద్ ఎడిటర్. ఈ సినిమాకు సంబంధించిన మరిన్ని వివరాలు త్వరలోనే తెలియజేయనున్నారు చిత్ర యూనిట్. ప్రభాస్ ఎంకరేజ్‌మెంట్‌తో శ్రీదేవి సోడా సెంటర్ టీమ్‌కు వెయ్యి ఏనుగుల బలం వచ్చినట్లైంది.