ప్ర‌భాస్ తో ఫుల్‌ పండగే

మిస్ట‌ర్ పెర్ఫెక్ట్ ప్ర‌భాస్ రేంజ్ ఇప్పుడు 25కోట్లు పైనే. బాహుబ‌లితో ఒక్క‌సారిగా స్కైని ట‌చ్ చేశాడు ఈ హీరో. బాహుబ‌లి 2 కోసం భారీపారితోషికం - ఏరియా హ‌క్కులు తీసుకుంటున్నాడ‌న్న వార్త‌లున్నాయి. అయితే ప్ర‌భాస్‌ ని ఈ రేంజులో త‌యారు చేసిన నిర్మాత‌ల మాటేమిటి? ప‌్ర‌భాస్ వ‌ల్ల బాగా లాభ‌ప‌డిన పంపిణీదారులు ఉన్నారా? ఇలాంటివి ఆరాతీస్తే కొన్ని ఇంట్రెస్టింగ్ విష‌యాలు బైటికి తెలిశాయి.

అస‌లు ప్ర‌భాస్ తో సినిమాలు తీసిన నిర్మాత‌ల కంటే ఓ డిస్ర్టిబ్యూట‌ర్ మాత్రం బాగా లాభ‌ప‌డ్డాడ‌న్న‌ది ఇండస్ర్టీ టాక్‌. ప్ర‌భాస్ న‌టించిన ఫ్లాప్ సినిమాల వ‌ల్ల కూడా ఈ పంపిణీదారుడు బాగా లాభ‌ప‌డ్డాడ‌ని ప‌రిశ్ర‌మ ఎన‌లిస్టులు చెబుతుంటారు. ప్ర‌భాస్ న‌టించిన వ‌ర్షం మొద‌లు ప్ర‌తి సినిమాని నైజాంలో రిలీజ్ చేసిన స‌ద‌రు పంపిణీదారుడు బుజ్జిగాడు - ఏక్ నిరంజన్ లాంటి ఫ్లాప్ సినిమాల‌తోనూ లాభ‌ప‌డ్డాడ‌ని చెప్పుకోవ‌డం విశేషం.

ప్ర‌భాస్ హీరోగా న‌టించిన ఛ‌త్ర‌ప‌తి - డార్లింగ్ వంటి సినిమాల వ‌ల్ల ఆ చిత్ర నిర్మాత బివిఎస్ ఎన్‌ కి లాభం వ‌చ్చిందో లేదో దేవుడెరుగు. ఈ రెండు సినిమాలు మాత్రం స‌ద‌రు నైజాం నిర్మాత‌కి నైజాం నుంచి భారీగా వ‌సూళ్లు తెచ్చాయి. అందుకే స‌ద‌రు నిర్మాత ప్రభాస్ సినిమా అన‌గానే ముందే నైజాం హ‌క్కుల‌పై ఖ‌ర్చీఫ్ వేసేస్తార‌ని చెబుతుంటారు. ఇటీవ‌లి కాలంలో ప్ర‌భాస్ న‌టించిన బాహ‌బ‌లి చిత్రాన్ని కూడా స‌ద‌రు నిర్మాత నైజాంలో రిలీజ్ చేశారు. కేవ‌లం ఈ ఒక్క ఏరియా నుంచే 40కోట్లు పైగా వ‌సూళ్లు ద‌క్కాయ‌న్న‌ది అప్‌ డేట్‌.

ఏదేమైనా ప్ర‌భాస్ వ‌ల్ల ప్ర‌భాస్ నిర్మాత‌ల కంటే నైజాం ఏరియా పంపిణీదారుడికే ఎక్కువ లాభం అన్న‌ది బ‌హిరంగ వాస్త‌వం అంటూ చ‌ర్చించుకోవ‌డం విశేషం. ప్ర‌భాస్‌ ని ఫుల్‌ గా క్యాష్ చేసుకున్న ఏకైక పంపిణీదారుడు ఎవ‌రు? చెప్పుకోండి చూద్దాం.