‘రాధేశ్యామ్’ సినిమాకు మిక్స్ డ్ టాక్.. ప్రభాస్ అభిమాని ఆత్మహత్య

రాధే శ్యామ్ మిక్స్‌డ్ టాక్‌తో మనస్తాపం చెందిన ఓ ప్రభాస్ అభిమాని తీవ్రమైన నిర్ణయం తీసుకున్నాడు. ఆత్మహత్య చేసుకొని తనువు చాలించాడు.. భారీ అంచనాల నడుమ మార్చి 11న విడుదలైన రాధేశ్యామ్ సినిమా అభిమానుల అంచనాలను అందుకోవడంలో విఫలమైంది.

దీంతో మొదటి రోజు నుంచే సినిమాకు మిక్స్‌డ్ టాక్ వచ్చింది. కర్నూలుకు చెందిన ప్రభాస్ అభిమాని సినిమాకు అంతగా ఆదరణ దక్కకపోవడంతో తీవ్ర మనస్తాపానికి గురై ఈ విపరీతమైన చర్య తీసుకున్నాడు.

వివరాల్లోకి వెళితే.. కర్నూలులో ముత్యాల రవితేజ (24) అనే వెల్డింగ్ కార్మికుడు పనిచేస్తున్నాడు. ఆయన తల్లి ఉషారాణి దినసరి కూలీ. ఈ ఇద్దరు కుటుంబానికి ఉపాధినందిస్తున్నారు. కాగా రవితేజ ప్రభాస్కు వీరాభిమాని. రాధే శ్యామ్ కోసం ఎంతో ఆసక్తిగా ఎదురుచూసిన రవితేజ విడుదల రోజునే సినిమా చూశాడు.

సినిమాకు మిశ్రమ ఫలితం రావడంతో అతను తన సన్నిహితులు.. తన తల్లితో కలిసి ఈ విషయంలో మథనపడుతున్నట్లు విచారం వ్యక్తం చేసినట్లు సమాచారం. శనివారం ఇంట్లో ఎవరూ లేని సమయంలో ప్రాణాలు తీసుకున్నాడు. సీలింగ్ ఫ్యాన్‌కు ఉరివేసుకుని ఆత్మహత్య చేసుకున్నాడు. ఈ విషయంపై పోలీసులకు సమాచారం అందించి కేసు దర్యాప్తు చేస్తున్నారు.

ఈ వార్త తెలిసిన అతడి స్నేహితులు.. ఇతర ప్రభాస్ అభిమానులు షాక్‌కు గురయ్యారు. రవితేజ విపరీతమైన చర్యపై పలువురు విచారం వ్యక్తం చేస్తున్నారు. రాధే శ్యామ్ రిజల్ట్‌ని ప్రభాస్ అభిమానులు నిరాశకు గురిచేసినట్లు తెలుస్తోంది. ఇక రాధే శ్యామ్ తెలుగు రాష్ట్రాల్లో మంచి ఓపెనింగ్స్ రాబట్టింది. అయితే ఈ చిత్రం హిందీలో డల్ స్టార్ట్ అయ్యింది. మరి సోమవారం నుంచి థియేటర్లలో ఈ సినిమా ఎలా ఉంటుందో చూడాలి.