'నిద్ర లే' అంటూ ప్రభాస్ ఫ్యాన్స్ నేషనల్ వైడ్ నెగిటివ్ ట్రెండ్..!

యంగ్ రెబల్ స్టార్ ప్రభాస్ - పూజా హెగ్డే జంటగా నటిస్తున్న వింటేజ్‌ లవ్ స్టొరీ ''రాధే శ్యామ్''. 'జిల్' ఫేమ్ రాధాకృష్ణ కుమార్ ఈ చిత్రానికి దర్శకత్వం వహిస్తున్నాడు. కృష్ణంరాజు సమర్పణలో యూవీ క్రియేషన్స్‌ - గోపీకృష్ణ బ్యానర్స్ పై వంశీ - ప్రమోద్‌ - ప్రసీద ఈ చిత్రాన్ని నిర్మిస్తున్నారు. ఇప్పటికే షూటింగ్ పూర్తి చేసుకున్న ఈ చిత్రాన్ని పాన్ ఇండియా లెవల్ లో జులై 30న విడుదల చేయనున్నారు. అయితే ప్రభాస్ సన్నిహితులైన యూవీ క్రియేషన్స్ వారు సినిమాకు సంబంధించిన అప్డేట్స్ ఇవ్వడం లేదని డార్లింగ్ ఫ్యాన్స్ అసహనానికి గురవుతున్నారు.

'రాధే శ్యామ్' సినిమా సెట్స్ పైకి వచ్చి రెండేళ్లు దాటింది. ఇప్పటికే షూటింగ్ కూడా పూర్తయింది. అయితే ఇప్పటి వరకు ఫస్ట్ లుక్ - గ్లిమ్స్ మాత్రమే వదిలారు. అవి కూడా ఫ్యాన్స్ ని నిరాశ పరిచాయనే కామెంట్స్ వచ్చాయి. మరో రెండున్నర నెలల్లో ప్రేక్షకుల ముందుకు రానున్న ఈ సినిమాకు సంబంధించిన అప్డేట్స్ ఇవ్వడం లేదని అభిమానులు నిర్మాతలపై ఆగ్రహం వ్యక్తం చేస్తున్నారు. మరోవైపు 'రాధే శ్యామ్' తర్వాత విడుదల కానున్న మిగతా స్టార్ హీరోల సినిమాల అప్డేట్స్ తో ఫ్యాన్స్ ని ఖుషీ చేస్తున్నారు. కానీ 'రాధే శ్యామ్' టీమ్ టీజర్ గానీ సాంగ్స్ గానీ రిలీజ్ చేయలేదు.

ఈ నేపథ్యంలో సోషల్ మీడియాలో ఇన్నాళ్లూ ప్రొడక్షన్ హౌస్ ని రిక్వెస్ట్ చేసి ఆవేదన వ్యక్తం చేసిన డార్లింగ్ అభిమానులు.. ఇప్పుడు పెద్ద ఎత్తున ట్రోల్ చేయడం స్టార్ట్ చేశారు. ట్విట్టర్ లో 'నిద్ర లే యూవీ క్రియేషన్స్' అంటూ హ్యాష్ ట్యాగ్ తో నెగెటివ్ ట్రెండ్ క్రియేట్ చేశాడరు. ఇది నేషనల్ వైడ్ ట్రెండ్ అవుతోంది. మరి ఇప్పటికైనా ఫ్యాన్స్ మొర ఆలకించి యూవీ క్రియేషన్స్ వారు 'రాధే శ్యామ్' అప్డేట్స్ ఇస్తారేమో చూడాలి.