ప్రభాస్‌ మూవీ ఆ సినిమాకు కాపీనా?

ప్రభాస్‌ ‘బాహుబలి’ చిత్రం తర్వాత కూడా అదే స్థాయి సినిమా చేయాలనే ఉద్దేశ్యంతో భారీ బడ్జెట్‌ తో ‘సాహో’ చిత్రాన్ని చేస్తున్న విషయం తెల్సిందే. బాహుబలిలా కాకున్నా బాహుబలి స్థాయిలో ఈ చిత్రం ఉంటుందని చిత్ర యూనిట్‌ సభ్యులు చేస్తున్న ప్రచారం చూస్తుంటే అనిపిస్తోంది. హాలీవుడ్‌ యాక్షన్‌ సినిమాల స్థాయిలో ఈ చిత్రంలో యాక్షన్‌ సీన్స్‌ ఉంటాయట. ‘సాహో’ చిత్రంతో పాటు ప్రభాస్‌ ‘జిల్‌’ ఫేం రాధాకృష్ణ దర్శకత్వంలో ఒక చిత్రాన్ని చేస్తున్న విషయం తెల్సిందే. రొమాంటిక్‌ ఎంటర్‌ టైనర్‌ గా ఈ చిత్రం ఉండబోతుందట.

పీరియాడిక్‌ కథాంశంతో ఈ చిత్రం ఉంటుందనే హింట్‌ ఇప్పటికే చిత్ర యూనిట్‌ సభ్యులు ఇచ్చారు. ఇప్పటికే ఒక షెడ్యూల్‌ ను కూడా పూర్తి చేసుకున్న ఈ చిత్రం కథ గురించి ప్రస్తుతం సినీ వర్గాల్లో చర్చ జరుగుతోంది. కొరియన్‌ మూవీ ‘మై సిస్సీ గర్ల్‌’ స్టోరీని ఇన్సిపిరేషన్‌ గా తీసుకుని రాధాకృష్ణ ఈ చిత్రం కథను రూపొందించాడట. 2001వ సంవత్సరంలో వచ్చిన ఆ కొరియన్‌ మూవీ సౌత్‌ ఆసియాలోనే అత్యధిక వసూళ్లు సాధించిన చిత్రంగా నిలిచిందట.

‘మై సిస్సీ గర్ల్‌’ చిత్రాన్ని పలు దేశాల్లో రీమేక్‌ చేయడంతో పాటు, చైనా, థైవాన్‌ తో పాటు ఇంకా పలు దేశాల్లో డబ్‌ చేసి విడుదల చేయడం జరిగింది. అన్ని చోట్ల కూడా మంచి వసూళ్లను రాబట్టి సక్సెస్‌ ను సొంతం చేసుకుందట. ఒక అమ్మాయి నిజ జీవిత కథ ఆధారంగా అప్పట్లో ఈ చిత్రం తెరకెక్కిందని, ఇప్పుడు ఆ కథకు రాధాకృష్ణ ఇండియన్‌ టచ్‌ ఇచ్చి సినిమాను చేస్తున్నట్లుగా సమాచారం అందుతోంది. ఈ చిత్రంలో హీరోయిన్‌ గా పూజా హెగ్డే నటిస్తున్న విషయం తెల్సిందే. ఈ చిత్రంలో ప్రభాస్‌ రొమాంటిక్‌ హీరోగా కనిపించబోతున్నాడు. మిర్చి తర్వాత ఇన్నాళ్లకు ఈ చిత్రంతో ప్రభాస్‌ రొమాంటిక్‌ ఎంటర్‌ టైనర్‌ చేయబోతున్నాడు.