అందుకే ముంబైలో తిష్ఠ వేశారా?

గ‌త కొంత‌కాలంగా డార్లింగ్ ప్ర‌భాస్ క్ష‌ణం తీరిక లేని షూటింగుల‌తో బిజీ బిజీగా ఉన్న సంగ‌తి తెలిసిందే. ఓ వైపు సాహో - మ‌రోవైపు జాన్ (రాధాకృష్ణ‌) షూటింగుల్లో బిజీగా ఉన్నాడు. అయితే ప్ర‌స్తుతం వాటికి కామా పెట్టి ప్ర‌భాస్ ముంబైలో హ‌ల్ చ‌ల్ చేయ‌డం హాట్ టాపిక్ అయ్యింది. నిన్న సాయంత్రం కేజీఎఫ్ హీరో య‌శ్ తో క‌లిసి ముంబైలోని ఓ పోష్ ఏరియాలో ఉన్న స్టార్ హోట‌ల్‌ లో డిన్న‌ర్ చేశాడు. య‌శ్ తో క‌లిసి కేజీఎఫ్ ప్ర‌మోష‌న్ కార్య‌క్ర‌మాల్లో పాల్గొన్నాడు.

అయితే ప్ర‌భాస్ కేవ‌లం కేజీఎఫ్ కోస‌మే కాదు.. వేరొక ముఖ్య‌మైన ప‌నిలోనూ ముంబైలో తిష్ఠ వేశాడ‌ని తెలుస్తోంది. ఈ వారం లైవ్ కానున్న `కాఫీ విత్ క‌ర‌ణ్` టీవీ షోలో అతిధిగా డార్లింగ్ త‌ళుక్కుమంటున్నాడట‌. ఈ షోలో కేవ‌లం ప్ర‌భాస్ మాత్ర‌మే కాదు.. బాహుబ‌లి త్ర‌యం ప్ర‌భాస్ - రానా - రాజ‌మౌళి మెరుపులు మెరిపిస్తార‌ని తెలుస్తోంది. ఆ ముగ్గురిని క‌ర‌ణ్ ఇప్ప‌టికే కొత్త ఎపిసోడ్ షూటింగ్ కోసం ఆహ్వానించారు. ఈ షూట్‌ లో పాల్గొనేందుకు ఆ ముగ్గురూ ముంబై వెళ్లార‌ని తెలుస్తోంది. ఆ క్ర‌మంలోనే ప్ర‌భాస్ అటు కేజీఎఫ్- హిందీ వెర్ష‌న్ ప్ర‌మోష‌న్ కార్య‌క్ర‌మంలోనూ పాల్గొన్నాడు.

క‌ర‌ణ్ జోహార్ తో బాహుబ‌లి టీమ్ బిగ్ డీల్ గురించి తెలిసిందే. బాహుబ‌లి హిందీ వెర్ష‌న్‌ ని క‌ర‌ణ్ జోహార్ రిలీజ్ చేశారు. ఆ సాన్నిహిత్యంతోనే ఇప్పుడిలా బుల్లితెర బిగ్ ఎపిసోడ్‌ ని ప్లాన్ చేశారు. ఇప్పుడు ఆ ముగ్గురిని టీవీ కార్య‌క్ర‌మానికి ఆహ్వానించ‌డం ద్వారా టాప్ టీఆర్‌ పీ గేమ్‌ కి తెర‌తీశాడు క‌ర‌ణ్‌. బాహుబ‌లి త్ర‌యంగా ఆ ముగ్గురిని లైవ్‌ లో వీక్షించేందుకు అటు ఉత్త‌రాది అభిమానుల్లోనూ క్యూరియాసిటీ నెల‌కొంద‌ట‌. ముఖ్యం గా ప్ర‌భాస్ కి ఉత్త‌రాదిన వీరాభిమానులు ఉన్నారు. ఈ కార్య‌క్ర‌మంలోనే డార్లింగ్ ప్ర‌భాస్ - రానాల‌ను క‌ర‌ణ్ కీల‌క‌మైన కొన్ని ప్ర‌శ్న‌లు అడుగుతార‌ని తెలిసింది. వృత్తిగ‌త జీవితంతో పాటు వ్య‌క్తిగ‌త జీవితంపైనా ఈ షోలో ప్ర‌శ్న‌లు ఉంటాయి. వాటికి ఈ బ్యాచిల‌ర్ హీరోలు ఎలా స్పందించ‌నున్నారోన‌న్న ఆస‌క్తిక‌ర‌ చ‌ర్చ అభిమానుల్లో సాగుతోంది. ఇలా సౌత్ నుంచి సెల‌బ్రిటీల్ని తొలిసారి కాఫీ విత్ క‌ర‌ణ్ షోలో వీక్షించే భాగ్యం ఉత్త‌రాది జ‌నాల‌కు క‌లుగుతోంది.