హస్తరేఖలు చూడబోతున్న ప్రభాస్

‘బాహుబలి’తో యంగ్ రెబల్ స్టార్ ప్రభాస్ తిరుగులేని ఇమేజ్.. ఫాలోయింగ్ సంపాదించాడు. అతడి తర్వాతి సినిమా ‘సాహో’పై అంచనాలు ఏ స్థాయిలో ఉన్నాయో తెలిసిందే. ఈ చిత్రం కొన్ని నెలలుగా చిత్రీకరణ జరుపుకుంటోంది. భారీ కాస్టింగ్.. భారీ యాక్షన్ ఎపిసోడ్లు.. విజువల్ ఎఫెక్టులతో కూడిన సినిమా కావడంతో షూటింగ్ ఆలస్యమవుతోంది. ఈ ఏడాదంతా కూడా చిత్రీకరణ కొనసాగే అవకాశముంది. ఐతే ‘బాహుబలి’ లాగా ఏళ్ల తరబడి కేవలం ఈ ఒక్క చిత్రానికే అంకితమైపోతే అభిమానులు నిరాశ చెందుతారని భావించి.. మధ్యలో మరో సినిమాను కూడా మొదలుపెట్టేస్తున్నాడు ప్రభాస్. ‘జిల్’ సినిమాతో దర్శకుడిగా పరిచయమైన రాధాకృష్ణకుమార్ దర్శకత్వంలో ప్రభాస్ ఓ సినిమా కమిటైన సంగతి తెలిసిందే. ఈ చిత్రం వచ్చే నెలలోనే సెట్స్ మీదికి వెళ్లబోతోంది.

ఈ చిత్రానికి సంబంధించిన ఒక ఆసక్తికర అప్ డేట్ బయటికి వచ్చింది. ఇందులో ప్రభాస్ హస్తరేఖలు చూసే నిపుణుడిగా కనిపించబోతున్నాడట. ఇదొక రొమాంటిక్ ఎంటర్టైనర్ అని.. ప్రస్తుత ప్రభాస్ ఇమేజ్ కు పూర్తి భిన్నంగా ఉంటుందని.. చాలా సరదాగా సాగిపోతుందని అంటున్నారు. ‘దువ్వాడ జగన్నాథం’ భామ పూజా హెగ్డే ఇందులో ప్రభాస్ సరసన నటించబోతోంది. ప్రభాస్ హోమ్ బ్యానర్ అనదగ్గ యువి క్రియేషన్స్ లోనే ఈ చిత్రం కూడా తెరకెక్కనుంది. ప్రస్తుతం ‘సాహో’ చిత్రాన్ని కూడా ఆ సంస్థే నిర్మిస్తోంది. ‘సాహో’తో పోలిస్తే రాధాకృష్ణ సినిమా తక్కువ బడ్జెట్లోనే తెరకెక్కుతుందట. ఆ చిత్రాన్ని కూడా తెలుగు-తమిళం-హిందీ భాషల్లో తెరకెక్కించనున్నారు. ‘సాహో’తో పాటు ఈ చిత్రం కూడా వచ్చే ఏడాదే కొన్ని నెలల వ్యవధిలో విడుదలయ్యే అవకాశాలున్నాయి.