సాహో అయిపోతుందా డార్లింగ్

ప్రభాస్ కెరీర్ లో బాహుబలి తర్వాత అంత భారీ బడ్జెట్ తో రూపొందుతున్న సాహోపై అభిమానులకే కాదు సామాన్య ప్రేక్షకుల్లో కూడా భారీ అంచనాలు ఉన్నాయి. ఇటీవలే సుదీర్ఘమైన దుబాయ్ షెడ్యూల్ ని పూర్తి చేసుకుని వచ్చిన సాహో టీమ్ తర్వాత హైదరాబాద్ లోనే షూట్ చేయబోతున్నారు. దుబాయ్ వెళ్లడానికంటే ముందు ఇక్కడే కొన్ని కీలక సన్నివేశాలు చిత్రీకరించిన దర్శకుడు సుజిత్ వాటి కంటిన్యూయేషన్ పార్ట్ పూర్తి చేయబోతున్నాడు. కీలకమైన యాక్షన్ పార్ట్ దుబాయ్ లోనే షూట్ చేసిన నేపథ్యంలో ఇక్కడ టాకీ పార్ట్ ఎక్కువ ఉంటుందని తెలిసింది. దాని తర్వాత యూరప్ వెళ్లే సాహో యూనిట్ అక్కడ జరిపే మరో ఇంపార్టెంట్ షెడ్యూల్ లో షూటింగ్ ప్యాకప్ చెప్పే అవకాశాలు ఉన్నాయి. అంత త్వరగా అయిపోతుందా అనుకోకండి. దీనికి చాలా సమయమే పడుతుంది. ఎంత లేదన్నా హైదరాబాద్ ప్లస్ యూరప్ భాగాలు పూర్తి చేయడానికి ఆరు నెలలు దాకా పట్టొచ్చు.

మరోవైపు పోస్ట్ ప్రొడక్షన్ పనులు కూడా జరుగుతున్నాయి. యాక్షన్ మూవీనే అయినప్పటికీ సిజి వర్క్ కి చాలా ప్రాధాన్యం ఉండటంతో దాని కోసం ప్రత్యేకంగా కొంత సమయం కేటాయించబోతున్నారు . అన్ని సవ్యంగా టైం ప్రకారం జరిగితే సాహోని సంక్రాంతి బరిలో నిలబెట్టవచ్చు కానీ అది ఈజీ అయితే కాదు. విడుదల ప్రకటించి అనక ఒత్తిడి పెంచుకోవడం ఎందుకని యువి సంస్థ కూడా ఎలాంటి ప్రకటన ఇవ్వడం లేదు. శ్రద్ధా కపూర్ హీరోయిన్ గా నటిస్తున్న ఈ మూవీలో బాలీవుడ్ ద్వయం మందిరా బేడీ-నీల్ నితీష్-జాకీ ష్రఫ్-చుంకీ పాండే-మహేష్ మంజ్రేకర్ తదితరులు కీలక పాత్రలు పోషిస్తున్నారు. శంకర్ ఎహసాన్ లాయ్ ద్వయం ట్యూన్స్ కంపోజింగ్ కూడా అయిపోయిందని టాక్ . బాహుబలి తర్వాత వస్తున్న మూవీ కనక దీని మీద దేశవ్యాప్తంగా ఆసక్తి ఉంది. వచ్చే జనవరి మిస్ అయితే కనక సాహో వచ్చేది నెక్స్ట్ సమ్మర్ లోనే. అప్పటిదాకా నిరీక్షణ తప్పదు.