సాహో.. యాక్షన్ టైం.. షురూ

బాహుబలి సినిమాతో యంగ్ రెబల్ స్టార్ ప్రభాస్ కు దేశవ్యాప్తంగా పాపులారిటీ వచ్చింది. దీంతో అతడి నెక్ట్స్ సినిమా సాహోపై విపరీతంగా అంచనాలు పెరిగాయి. అందుకు తగ్గట్టే హై ఓల్టేజ్ యాక్షన్ ఎంటర్ టెయినర్ గా ఈ సినిమాను తెరకెక్కిస్తున్నారు. మూవీలో కీలకమైన 20 నిమిషాల యాక్షన్ ఎపిసోడ్ ను దుబాయ్ లో తీయాలని యూనిట్ ప్లాన్ చేసింది.

బుర్జ్ ఖలీఫా.. వరల్డ్ ట్రేడ్ సెంటర్.. ఎతిహాద్ టవర్స్ వద్ద ఈ యాక్షన్ ఎపిసోడ్స్ ప్లాన్ చేశారు. కానీ దుబాయ్ అఫీషియల్స్ నుంచి పర్మిషన్ రాకపోవడంతో రెండు మూడుసార్లు టూర్ వాయిదా వేయాల్సి వచ్చింది. ఎట్టకేలకు ఈ టీంకు దుబాయ్ అఫీషియల్స్ నుంచి గ్రీన్ సిగ్నల్ వచ్చింది. దీంతో సినిమా యూనిట్ మొత్తం దుబాయ్ బయలుదేరి వెళ్లింది. హాలీవుడ్ స్టంట్ మాస్టర్ కెన్సీ బేట్స్ ఈ స్టంట్స్ డిజైన్ చేస్తున్నాడు. ఇక్కడ చిత్రీకరించే యాక్షన్ ఎపిసోడ్ సినిమా మొత్తానికి హైలైట్ గా నిలిచే అంశం కావడంతో దీనికోసం యూనిట్ సభ్యులంతా సర్వశక్తులు ఒడ్డి పనిచేస్తున్నారు.

రన్ రాజా రన్ ఫేం సుజిత్ డైరెక్షన్ లో యువీ క్రియేషన్స్ బ్యానర్ పై సాహో తెరకెక్కుతోంది. బాలీవుడ్ బ్యూటీ శ్రద్ధాకపూర్ హీరోయిన్ గా నటిస్తుండగా.. నీల్ నితిన్ ముఖేష్ విలన్ గా కనిపించనున్నాడు. సాహో యూనిట్ మొత్తం ఈ నెలరోజుల పాటు దుబాయ్ లోనే మకాం వేయనుంది.