శ్ర‌ద్ధాకు 18 వంట‌కాలు తినిపించాడు

`ఆషిఖి 2` చిత్రంలో అద్భుత అభిన‌యంతో మైమ‌రిపించింది శ్ర‌ద్ధా క‌పూర్‌. ఒక గ‌ల్లీ సింగ‌ర్‌ వ‌ర్థ‌మాన గాయ‌నిగా ఎదిగే క్ర‌మంలో ల‌వ్‌ - ఎమోష‌నల్ స్టోరీతో తెర‌కెక్కిన ఈ చిత్రంలో శ్ర‌ద్ధా హావ‌భావాలు కుర్రాళ్ల క‌ళ్ల‌లో కాపురం చేశాయి. ఆ సినిమా క్రేజు ఇప్ప‌టికీ అలానే ఉంది. శ్ర‌ద్ధా న‌టించిన సినిమాల‌న్నీ వ‌రుస‌గా యూత్‌ కి పిచ్చిగా న‌చ్చాయి. బాలీవుడ్‌ లో మోస్ట్ వాంటెడ్ క‌థానాయిక‌గా మారింది. ఆ క్ర‌మంలోనే టాలీవుడ్‌ లో డార్లింగ్ ప్ర‌భాస్ నుంచి ఊహించ‌ని ఆఫ‌ర్‌. ఇండియాస్ బిగ్గెస్ట్ యాక్ష‌న్ ఎంట‌ర్‌టైన‌ర్ `సాహో` అదృష్టం త‌న‌ని వెతుక్కుంటూ వ‌చ్చింది. కాస్తంత పెద్ద పేచెక్‌ ని ఆఫ‌ర్ చేసిన ప్ర‌భాస్‌- యు.వి.క్రియేష‌న్స్ బృందం ఈ సినిమాని ఎంతో ప్ర‌తిష్ఠాత్మ‌కంగా తెర‌కెక్కిస్తోంది.

ఇక ముంబై నుంచి వ‌చ్చినంత మాత్రాన ప‌రాయి అమ్మాయి కాకూడ‌ద‌ని భావించాడో ఏమో.. మ‌న ప్ర‌భాస్ శ్ర‌ద్ధాకి అస్స‌లు ఏ క‌ష్టం రాకుండా అన్నీ తానే అయ్యి చూసుకుంటున్నాడ‌ట‌. ఇంకా చెప్పాలంటే శ్ర‌ద్ధాకు హైద‌రాబాద్ రెండో ఇల్లుగా మార్చ‌డంలో స‌ఫ‌లీకృతుడ‌య్యాడ‌ట‌. ప్ర‌భాస్‌- సుజీత్ & టీమ్ శ్ర‌ద్ధాతో క‌లిసి హైద‌రాబాద్‌ లో వెరైటీ వెరైటీ వంట‌కాలు టేస్ట్ చేస్తున్నారుట‌. అందుకోసం ర‌క‌ర‌కాల రెస్టారెంట్‌లు, హోట‌ళ్ల‌కు వెళుతున్నార‌ట‌. ఓచోట దాదాపు 17-18 వంట‌కాల్ని శ్ర‌ద్ధాకి టేస్ట్ చూపించార‌ట‌. అమేజింగ్ హైద‌రాబాద్‌ ఫుడ్ అంటూ శ్ర‌ద్ధ వీట‌న్నిటినీ శ్రద్ధ‌గా లాగించేసింద‌ని తెలుస్తోంది. మొత్తానికి ఇల్లు మ‌ర్చిపోయి రెండో ఇంటిని సుస్థిరం చేసేస్తున్నారు మ‌న బోయ్స్‌. ప్చ్‌!!!