అతడికి ప్రభుదేవా డ్యాన్స్ కంపోజింగ్

ప్రభుదేవా నటుడిగా మారి ఉండొచ్చు. దర్శకత్వమూ చేసి ఉండొచ్చు. కానీ అతను బేసిగ్గా ఒక డ్యాన్స్ మాస్టర్. అతడికి తిరుగులేని పేరు వచ్చింది నృత్యంతోనే. దేశంలోనే బెస్ట్ డ్యాన్స్ మాస్టర్‌గా అతను కితాబందుకున్నాడు. అతడిని ఇండియన్ మైకేల్ జాక్సన్ అని పిలుచుకుంటారు అభిమానులు. కేవలం దక్షిణాదినే కాదు.. దేశవ్యాప్తంగా అతడికి డ్యాన్స్ మాస్టర్‌గా గొప్ప పేరుంది. 80లు.. 90ల్లో నృత్య దర్శకుడిగా అతడి హవా ఎలా సాగిందో తెలిసిందే. ఐతే నటన.. దర్శకత్వం మీద దృష్టి పెట్టి తనకు తానుగా డ్యాన్స్ కొరియోగ్రఫీకి దూరమయ్యాడు ప్రభు. ఐతే అతను చాలా విరామం తర్వాత మళ్లీ ఒక సినిమాకు నృత్య దర్శకుడిగా పని చేయబోతుండటం విశేషం. ఆ సినిమా.. ధనుష్ కథానాయకుడిగా నటిస్తున్న ‘మారి-2’.

ఈ సినిమాలో ఒక పాటకు ప్రభుదేవా డ్యాన్స్ కంపోజింగ్ చేస్తున్నాడని.. ఆయన నృత్య దర్శకత్వంలో తాను డ్యాన్స్ చేయబోతుండటం తన అదృష్టమని ధనుష్ వెల్లడించాడు. నిజానికి గత ఏడాది వచ్చిన మెగాస్టార్ చిరంజీవి రీఎంట్రీ మూవీ ‘ఖైదీ నంబర్ 150’ కోసమే ప్రభుదేవాను అడిగారు. కానీ అతను అప్పుడు బిజీగా ఉండి ఒప్పుకోలేదు. చిరుకే నో చెప్పిన ప్రభు.. ధనుష్ కోసం ఓకే చెప్పడం విశేషం. మరి మంచి డ్యాన్సర్ అయిన ధనుష్ కోసం ప్రభు ఎలాంటి స్టెప్పులు కంపోజ్ చేస్తాడో చూడాలి. ప్రభు కంపోజ్ చేశాడంటే ఆ పాట కచ్చితంగా ప్రత్యేకంగానే ఉంటుంది. ఇక ‘మారి-2’ సినిమా విషయానికి వస్తే.. బాలాజీ మోహన్ దర్శకత్వంలో వచ్చిన ‘మారి’కి ఇది సీక్వెల్. ‘మారి’ యావరేజ్‌గా ఆడినప్పటికీ దానికి సీక్వెల్ తీస్తుండటం విశేషమే. ప్రస్తుతం ధనుష్ దీంతో పాటుగా ‘వడ చెన్నై’ అనే సినిమాలోనూ నటిస్తున్నాడు. అది సెప్టెంబర్లో.. ‘మారి-2’ ఏడాది చివర్లో రిలీజవుతాయి.