మ‌ళ్లీ ఆ స్టార్ హీరోతో ప్ర‌భుదేవా

ద‌బాంగ్ బాలీవుడ్‌లో క‌లెక్ష‌న్ల సునామీ సృష్టించిన సినిమా. ఈ సినిమా సీక్వెల్‌గా ద‌బాంగ్ 2 వ‌చ్చిన సంగ‌తి తెలిసిందే. ఇప్పుడు సీక్వెల్ 3 కూడా తీసేందుకు స‌ర్వం సిద్ధం అవుతోంది. ద‌బాంగ్ 3 తీసే బాధ్య‌త ప్ర‌భుదేవాపై ప‌డింది. ప్ర‌భుదేవాకు అవ‌కాశం ఇచ్చేందుకు స‌ల్మాన్ ఖాన్ కూడా ఒప్పుకున్నాడ‌ట‌.

స‌ల్మాన్ ఖాన్‌... ప్ర‌భుదేవా కాంబినేష‌న్లో వ‌చ్చిన సూప‌ర్ హిట్ సినిమా వాంటెడ్. తెలుగులో వ‌చ్చిన పోకిరి సినిమాను వాంటెడ్ పేరుతో రీమేక్ చేశారు. ఆ సినిమా కాసుల వ‌ర్షం కురిపించింది. అప్ప‌టివ‌ర‌కు ఫ్లాపులతో స‌త‌మ‌త‌మైన స‌ల్మాన్‌కు వాంటెడ్ హిట్ బూస్ట్ లా ప‌నిచేసింది. వారిమ‌ధ్య మంచి స్నేహం కూడా కుదిరింది. ఆ త‌రువాత ప్ర‌భుదేవా కొన్ని సినిమాలు చేసిన‌ప్ప‌టికీ క‌లిసిరాలేదు. వ్య‌క్తిగ‌తంగా కూడా న‌య‌న‌తార‌తో అనుబంధం బెడిసికొట్టింది. కెరీర్‌ లో బాగా వెనుక‌బ‌డ్డాడు ప్ర‌భుదేవా. ట్రాక్ రికార్డు బాగోక పోవ‌డంతో అత‌నికి మంచి అవ‌కాశాలు కూడా రాలేదు. చివ‌రికి ఎలాగో ఇప్పుడు మంచి అవ‌కాశాన్ని ద‌క్కించుకున్నాడు.

ద‌బాంగ్ మొద‌ట పార్ట్‌ కు అభిన‌వ్‌క‌శ్య‌ప్ ద‌ర్శ‌క‌త్వం వ‌హించాడు. రెండో పార్ట్ స‌ల్లూ భాయ్ త‌మ్ముడు అర్భాజ్ ఖాన్ ద‌ర్శ‌క‌త్వం వ‌హించాడు. ఇప్పుడు ద‌బాంగ్ మూడో పార్టును ద‌ర్శ‌క‌త్వం వ‌హించే అవ‌కాశం ప్ర‌భుదేవాకు వ‌చ్చింది. ఈ సినిమాలో కూడా సోనాక్షి సిన్హానే హీరోయిన్‌ గా పెట్టుకోవాల‌ని చిత్ర‌యూనిట్ నిర్ణ‌యించిన‌ట్టు స‌మాచారం. అలాగే అర్భాజ్ ఖాన్ కూడా ఒక ముఖ్య‌పాత్రలో న‌టించ‌బోతున్నాడు.