సల్మాన్ అడిగితే వద్దంటానా-ప్రభుదేవా?

డ్యాన్స్ డైరెక్టర్‌ గా ప్రస్థానం మొదలుపెట్టి.. ఆ తర్వాత నటుడిగా మారి.. ఆపై డైరెక్టర్ గా కూడా మారాడు ప్రభుదేవా. తెలుగు.. తమిళంతో పాటు హిందీలోనూ అతను సినిమాలు చేశాడు. హిందీలో అతడికి కొన్ని మెమొరబుల్ హిట్లున్నాయి. అందులో సల్మాన్ ఖాన్ హీరోగా చేసిన ‘వాంటెడ్’ ఒకటి. ‘పోకిరి’కి రీమేక్ గా తెరకెక్కిన ఈ చిత్రం అప్పట్లో బ్లాక్ బస్టర్ అయింది. వరుస ఫ్లాపుల్లో ఉన్న సల్మాన్ మళ్లీ పుంజుకున్నది ఈ సినిమాతోనే. అందుకే ప్రభుదేవా మీద అతడికి ప్రత్యేక అభిమానం. ఆ అభిమానంతోనే ఇప్పుడు ప్రభుతో మరో సినిమా చేయడానికి రెడీ అయ్యాడు. కొంత కాలంగా దర్శకత్వం పక్కన పెట్టి నటన మీద ఫోకస్ చేసిన ప్రభుదేవా మళ్లీ సల్మాన్ సినిమాతో దర్శకత్వంలోకి రీఎంట్రీ ఇవ్వబోతుండటం విశేషం.

సల్మాన్ తో సినిమా చేయబోతున్న విషయం వాస్తవమే అని ప్రభుదేవా సైతం కన్ఫమ్ చేశాడు. సల్మాన్ పిలిచి సినిమా చేయమంటే ఎవరైనా వద్దంటారా అంటూ మీడియా వాళ్లను నవ్వుతూ ప్రశ్నించాడు ప్రభుదేవా. సల్మాన్ ఖాన్ సూపర్ హీరో అని.. చాలా స్పెషల్ అని.. హిట్లు ఫెయిల్యూర్లతో సంబంధం లేని ఫాలోయింగ్ అతడిదని అన్నాడు ప్రభుదేవా. సల్మాన్ తో ప్రభుదేవా చేయబోయేది ‘దబంగ్-3’ అని ప్రచారం జరుగుతోంది. దీనిపై ప్రభుదేవాను ప్రశ్నిస్తే.. ఔనన్నట్లే మాట్లాడాడు. ఈ సినిమాలో హీరో పోలీసుగా ఉంటాడని.. మిగతా పాత్రలూ కొనసాగుతాయని.. ఒక్క దర్శకుడు మాత్రమే మారుతున్నాడని తన మీద తాను జోక్ వేసుకున్నాడు. 2010లో వచ్చిన బ్లాక్ బస్టర్ ‘దబంగ్’కు అభినవ్ కశ్యప్ దర్శకత్వం వహించగా.. ఆ తర్వాత ‘దబంగ్-2’ను సల్మాన్ తమ్ముడు అర్బాజ్ ఖాన్ డైరెక్ట్ చేశాడు.