కొత్త అవతారంలో ప్రభుదేవా?

డ్యాన్స్‌ డైరెక్టర్‌గా పరిచయమై ఇండియన్‌ మైకేల్‌ జాక్సన్‌గా దేశవ్యాప్తంగా గుర్తింపు సంపాదించాడు ప్రభుదేవా. ఆ తర్వాత హీరో అవతారమెత్తి 'ప్రేమికుడు' లాంటి సూపర్‌ హిట్‌తో ఎంట్రీ ఇచ్చాడు. ఆ తర్వాత బోలెడన్ని సినిమాలు చేశాడు. 'నువ్వొస్తానంటే నేనొద్దంటానా' లాంటి క్లాసిక్‌కు దర్శకత్వం వహించి.. ఆ రంగంలోనూ విజయవంతమయ్యాడు. ప్రస్తుతం డైరెక్టర్‌గా బాలీవుడ్‌లో బాగానే సెటిలైపోయాడు. త్వరలోనే ప్రభుదేవాను ఇంకో కొత్త అవతారంలో చూడబోతున్నాం. అతను నిర్మాతగా తమిళంలో ఓ సినిమా చేయబోతున్నట్లు సమాచారం. జయం రవి హీరోగా ఆ సినిమా ఉంటుందట.

ఈ మధ్య ఓ తమిళ సినిమాలో హీరో వేషం వేయడానికి ఒప్పుకున్న ప్రభుదేవా.. చెన్నైలో ఉండగా జయం రవి కొత్త సినిమా 'రోమియో జూలియట్‌' స్పెషల్‌ షోకు ప్రభుదేవాను ఆహ్వానించారట. ఆ సినిమా ప్రభుకు తెగ నచ్చేసిందట. దీన్ని హిందీలో రీమేక్‌ చేస్తే బాగుంటుందని అభిప్రాయపడిన దర్శకుడు లక్ష్మణ్‌తో దీనిపై చర్చిస్తుండగా.. అతనో కొత్త స్క్రిప్టు గురించి చెప్పాడట. అది ప్రభుదేవాకు బాగా నచ్చేసి.. ఈ సినిమాను తమిళంలో తనే నిర్మిస్తానంటూ ముందుకొచ్చాడట. జయం రవినే హీరోగా పెట్టుకోమని కూడా సూచించాడట. ఏదో సరదాగా ప్రభుదేవాను తన సినిమా చూడ్డానికి రమ్మంటే.. తనతో సినిమా నిర్మించడానికి ముందుకు రావడం చూసి ఆనందంతో ఉబ్బితబ్బిబ్బయిపోతున్నాడట డైరెక్టర్‌ లక్ష్మణ్‌.