సుధీర్ బాబు చేయాల్సింది.. ఆ యాంకర్ చేతికి

యాంకరింగ్ నుంచి హీరోయిన్ అవుతున్న అమ్మాయిలు చాలామందే కనిపిస్తున్నారు ఈ మధ్య. ఐతే ఇప్పుడు ఓ మేల్ యాంకర్ సైతం హీరో అవుతున్నాడు. ప్రస్తుతం తెలుగులో నెంబర్ వన్ యాంకర్ ఎవరు అంటే మరో మాట లేకుండా ప్రదీప్ మాచిరాజు పేరు చెప్పేయొచ్చు. ఇప్పుడిక్కడ మాట్లాడుకుంటోంది అతడి గురించే. తమిళ హిట్ మూవీ ‘ముందాసుపట్టి’ రీమేక్ లో అతను కథానాయకుడిగా నటించబోతున్నట్లు సమాచారం.

ముందు ఈ సినిమాను సుధీర్ బాబు హీరోగా తెరకెక్కించాలని అనుకున్నారు. కానీ కొన్ని కారణాల వల్ల కుదరలేదు. ఇప్పుడు అనూహ్యంగా ప్రదీప్ రేసులోకి వచ్చాడు. తమిళంలో విష్ణువిశాల్ ఈ సినిమాలో కథానాయకుడిగా నటించాడు. ‘ముందాసుపట్టి’ ఓ కామెడీ సినిమా. ఐతే ఈ కథ 80ల్లో సాగుతుంది. హీరో అప్పటి అవతారంలోనే కనిపించాలి. మరి ప్రదీప్ అలాంటి పాత్రకు ఎలా సూటవుతాడో చూడాలి.

జీ తెలుగులో ‘గడుసరి అత్త సొగసరి కోడలు’ ప్రోగ్రాంతో పాపులరయ్యాడు ప్రదీప్. ఆ గుర్తింపుతో ఆల్రెడీ కొన్ని సినిమాల్లో నటించాడు. ‘అత్తారింటికి దారేది’లోనూ ఓ ఫన్నీ క్యారెక్టర్ చేశాడు. గత ఏడాది ‘భమ్ బోలే నాథ్’ అనే సినిమాలో ముగ్గురు హీరోల్లో ఒకడిగా కనిపించాడు. ఇటీవలే ‘కొంచెం టచ్ లో ఉంటే చెబుతాను’ షోతో ప్రదీప్ రేంజే మారిపోయింది. ఈ ప్రోగ్రాం తెలుగులో అత్యధిక టీఆర్పీ రేటింగ్ వస్తున్న కార్యక్రమాల్లో ఒకటి. ఆ షోతో ప్రదీప్ కు వచ్చిన పాపులారిటీని క్యాష్ చేసుకుందామని సోలో హీరోగా ఛాన్స్ ఇస్తున్నారు.