అక్కడ అదృష్టం వెతుక్కుంటున్న ప్రకాష్‌

డాక్టర్ కొడుకు డాక్టర్ అవుతాడేమో కానీ టాలీవుడ్ లో మాత్రం యాక్టర్ కొడుకు అయినా డైరెక్టర్ కొడుకు అయినా ముందు యాక్టరే అవుతాడు. అలానే దర్శకేంద్రుడు రాఘవేంద్ర రావు వారసుడిగా ప్రకాష్ కోవెలమూడి కూడా హీరోగానే ఎంట్రీ ఇచ్చాడు. నీతో, మార్నింగ్ రాగ అనే ప్లాప్ సినిమాల్లో నటించి విసిగిపోయి డైరెక్టర్ అవతారం ఎత్తాడు.

డైరెక్టర్ గా మారిన ప్రకాష్ మూడుసార్లు ట్రైల్స్ వేసాడు. బొమ్మలాట, అనగనగా ఒక ధీరుడు, సైజ్ జీరో సినిమాలకు దర్శకత్వం వహించాడు. కానీ అందులో ఒక్కటి కూడా పెద్దగా ఆడింది లేదు. ఆదరణ పొందిందీ లేదు. అయినా పట్టు వదలని విక్రమార్కుడిలా మరోసారి ప్రయత్నించడానికి సిద్ధమయ్యాడు. కానీ టాలీవుడ్ అచ్చి రాలేదు అనుకున్నాడో ఏమో ఈసారి బాలీవుడ్ లో సినిమా చేయడానికి రెడీ అవుతున్నాడు. అదికూడా మాములు హీరోయిన్ తో కాదండోయ్ ఫైర్ బ్రాండ్ కంగనా రనౌత్ తో తన సినిమా చేస్తున్నాడు. అంతేకాదు.. ఈ సినిమాకు అతని భార్య కనికా థిల్లాన్ స్ర్కిప్ట్ అందించింది.

'మెంటల్ హై క్యా' అనే టైటిల్ తో ప్రేక్షకుల ముందుకు రాబోతున్న ఈ సినిమాను ఏక్తా కపూర్ నిర్మిస్తోంది. ఇందులో హీరో రాజ్ కుమార్ రావు కావడం విశేషం. రాజ్ కుమార్ రావు, కంగనా ముందు నటించిన క్వీన్ సినిమా ఇద్దరి కెరీర్స్ లోను మర్చిపోలేని హిట్ గా మారింది. మరిప్పుడు ఏమవుతుందో చూదాం..