సావిత్రి సినిమాలో ఎన్టీఆర్ అతనేనా?

మహానటి సావిత్రి జీవితంపై తెరకెక్కుతున్న సినిమా మహానటి. ఇప్పటికే కొంత భాగం జరుపుకున్న ఈ చిత్రంలో నటీనటుల ఎంపిక ఆశ్చర్యం కలిగిస్తోంది. సావిత్రి పాత్రలో మలయాళ నటి కీర్తి సురేష్ నటిస్తుండగా.. ఈ సినిమా కథను చెప్పే జర్నలిస్ట్ పాత్రలో సమంత యాక్ట్ చేస్తోంది.

అయితే.. సావిత్రి జీవితం అంటే ఆమె సినీ.. వ్యక్తిగత జీవితాల్లో ప్రముఖుల పాత్రలు తప్పనిసరిగా ఉండాల్సిందే. సావిత్రి జీవిత భాగస్వామి అయిన జెమినీ గణేశన్ పాత్రలో దుల్కర్ సల్మాన్ నటిస్తున్నాడంటూ ఇప్పటికే కొంత క్లారిటీ ఉంది. ఎస్వీ రంగారావు పాత్రను విలక్షణ నటుడు మోహన్ బాబు చేతిలో పెట్టారనే టాక్ గట్టిగానే వినిపిస్తోంది. అయితే.. ఈ సినిమాలో ఎన్టీఆర్.. ఎఎన్నార్ ల పాత్రల్లో ఎవరు కనిపించబోతోన్నారనే సస్పెన్స్ కు ఇంకా తెరపడలేదు. ఇప్పటివరకూ వినిపించిన యాక్టర్స్.. వారి తీరుతెన్నుల ప్రకారం చూస్తే.. యంగ్ హీరో విజయ్ దేవరకొండతో అక్కినేని నాగేశ్వరరావు పాత్రను చేయిస్తున్నారనే అంచనాలు ఉన్నాయి.

మరి ఎన్టీఆర్ ఎవరు.. ఈ ప్రశ్నకు ప్రకాష్ రాజ్ అనే సమాధానం వినిపిస్తోంది. ఈ సినిమాకు ఎంపిక చేసిన నటీనటుల్లో మహానటుడు ఎన్టీఆర్ పాత్రను మెప్పించేందుకు ప్రకాష్ రాజ్ కంటే బెటర్ ఆప్షన్ ఉండదని అనడంలో పెద్దగా సందేహాలు అక్కర్లేదు. ఇందులో నిజానిజాల సంగతి ఇంకా తెలియదు. మహానటి టీంకు కూడా ఈ గుట్టును ఇప్పట్లో విప్పే ఉద్దేశ్యం కూడా లేదు.