ప్ర‌కాష్ రాజ్.. కృష్ణ‌వంశీ మార్కు క్యారెక్ట‌ర్లో

విల‌క్ష‌ణ న‌టుడు ప్ర‌కాష్ రాజ్ ను స‌మ‌ర్థంగా ఉప‌యోగించుకున్న తెలుగు ద‌ర్శ‌కుల్లో కృష్ణ‌వంశీ పేరు ముందు చెప్పుకోవాలి. అంతఃపురం.. స‌ముద్రం.. ఖ‌డ్గం లాంటి సినిమాల్లో ప్ర‌కాష్ రాజ్ పాత్ర‌ల గురించి ఎంత చెప్పినా త‌క్కువే. కృష్ణ‌వంశీ చివ‌రి సినిమా ‘గోవిందుడు అంద‌రివాడేలే’లోనూ త‌న ప్ర‌త్యేక‌త చూపించాడు ప్ర‌కాష్ రాజ్. ఇక ఈ క్రియేటివ్ డైరెక్ట‌ర్ కొత్త సినిమా ‘న‌క్ష‌త్రం’లోనూ ప్ర‌కాష్ రాజ్ ఓ విల‌క్ష‌ణ పాత్ర చేస్తున్నాడు. ఆ పాత్ర తాలూకు ఫ‌స్ట్ లుక్ ను ఇవాళే లాంచ్ చేశారు. ‘న‌క్ష‌త్రం’ తాలూకు ప‌ది ఫ‌స్ట్ లుక్స్ ఒక్కొక్క‌టిగా రామ్ చ‌ర‌ణ్ లాంచ్ చేస్తున్న సంగ‌తి తెలిసిందే.

‘న‌క్ష‌త్రం’ సినిమాలో సందీప్ కిష‌న్.. సాయిధ‌ర‌మ్ తేజ్.. ప్ర‌గ్యా జైశ్వాల్ పోలీసు పాత్ర‌లు చేస్తున్న సంగ‌తి తెలిసిందే. ప్ర‌కాష్ రాజ్ ది కూడా ఖాకీ పాత్రే. ఈ క్యారెక్ట‌ర్ కోసం మీసం లేకుండా క‌నిపించ‌నున్నాడు ప్ర‌కాష్‌. ఫ‌స్ట్ లుక్ చూస్తే మంచి ఇంటెన్సిటీ ఉన్న క్యారెక్ట‌ర్లాగే క‌నిపిస్తోంది. తెలుగులో ఈ మ‌ధ్య ప్ర‌కాష్ రాజ్ ముద్ర క‌నిపించి చాలా కాల‌మైంది. కొంత కాలంగా ఆయ‌న తెర‌మ‌రుగైపోయారు. ద‌స‌రాకు త‌న సినిమా ‘మ‌న‌వూరి రామాయ‌ణం’లో త‌న ప్ర‌త్యేక‌త చూపించాడు కానీ... ఆ సినిమా జనాల్లోకి వెళ్ల‌లేదు. మ‌రి ‘న‌క్ష‌త్రం’ సినిమాతో ప్ర‌కాష్ రాజ్ ఎలాంటి ముద్ర వేస్తాడో చూడాలి.

Like Us on Facebook : https://www.facebook.com/Tupakidotcom/