విల‌క్ష‌ణ న‌టుడు కొత్త పార్టీ?

ఆన్ లొకేష‌న్ లీకేజీలు నిర్మాత‌ల్ని టెన్ష‌న్ కి గురి చేయ‌డం స‌హ‌జం. భారీ సినిమాల సెట్స్ నుంచి ఎప్ప‌టిక‌ప్పుడు లీకులు చూస్తూనే ఉన్నాం. ద‌ర్శ‌క‌నిర్మాత‌లు ఎంత క‌ట్ట‌డి చేసినా ఈ లీకుల్ని ఆప‌లేక‌పోతున్నారు. సూప‌ర్ స్టార్ మ‌హేష్ న‌టించిన గ‌త చిత్రాల‌కు ఇలాంటి అనుభ‌వం ఎదురైంది. తాజాగా ఆన్ సెట్స్ ఉన్న `స‌రిలేరు నీకెవ్వ‌రు` చిత్రానికి ఇలాంటివి త‌ప్ప‌డం లేదు.

స‌రిలేరు నీకెవ్వ‌రు సెట్స్ నుంచి ఇప్ప‌టికే ప‌లుమార్లు స్టిల్స్ లీక‌య్యాయి. దీంతో అస‌లు ఈ సినిమా క‌థేంటి అన్న‌ది కూడా అర్థ‌మైపోయింది. తాజాగా మ‌రో లీక్డ్ ఫోటో బ‌య‌ట‌కు వ‌చ్చింది. ఈ ఫోటోలో విల‌క్ష‌ణ న‌టుడు ప్ర‌కాష్ రాజ్ పై కీల‌క స‌న్నివేశాలు తెర‌కెక్కించ‌నున్నార‌ని అర్థ‌మ‌వుతోంది. ప్ర‌కాష్ రాజ్ ఒక రాజ‌కీయ నాయ‌కుడిగా న‌టిస్తున్నార‌ని.. ఆయ‌న ప్ర‌జా గ‌ర్జ‌న స‌భ‌కు అటెండ‌య్యే సీన్స్ తీస్తున్నార‌ని ఈ లీక్డ్ ఫోటో చెబుతోంది. ప్ర‌జా సంక్షేమ పార్టీ ప్ర‌జాగ‌ర్జ‌న స‌భ కోసం భారీగా స్టేజీ వేసి.. టెంట్లు వేసి.. కుర్చీల్ని సిద్ధం చేశారు. ఆ వేదిక ముందు భారీగా ప్ర‌జా సంక్షేమ పార్టీ అధినేత ప్ర‌కాష్ రాజ్ క‌టౌట్ ఆక‌ట్టుకుంటోంది. అయితే ఇంకా సెట్స్ వేస్తున్న ఫోటోనే లీక్ అయ్యింది.

వాస్త‌వానికి ప్ర‌కాష్ రాజ్ స్థానంలో ఈ పాత్ర‌లో జ‌గ‌ప‌తిబాబు న‌టించాల్సింది. కానీ ఆయ‌న అనూహ్యంగా త‌ప్పుకోవ‌డంతో ప్ర‌కాష్ రాజ్ ని ఎంపిక చేసుకున్న సంగ‌తి తెలిసిందే. అలాగే ఈ చిత్రంలో విజ‌య‌శాంతి కాలేజ్ లెక్చ‌ర‌ర్ పాత్ర‌లో న‌టిస్తున్నారు. త‌న‌ని ఏడిపించే విద్యార్థుల‌కు బుద్ధి చెప్పే ఆర్మీ అధికారిగా మ‌హేష్ న‌టిస్తున్నారు. ర‌ష్మిక మంద‌న ఇందులో క‌థానాయిక‌గా న‌టిస్తోంది. 2020 సంక్రాంతికి ఈ చిత్రం రిలీజ్ కానుంది.