ప్రకాష్ రాజ్ వాయిస్ తో ఆ సినిమా

బెల్లంకొండ సాయి శ్రీనివాస్ సినిమా అంటే ప్రొడక్షన్ విషయంలో అసలు రాజీ అన్నదే ఉండదు. భారీ తారాగణం.. పేరు మోసిన టెక్నీషియన్లు.. లావిష్ ప్రొడక్షన్ వాల్యూస్ తో సినిమాను భారీగా తీర్చిదిద్దడానికి ప్రయత్నం జరుగుతుంటుంది. శ్రీనివాస్ తండ్రి సురేష్ బ్యాకప్ తోనే ఇవన్నీ సాధ్యమవుతాయి అంటారు. ‘అల్లుడు శీను’.. ‘జయ జానకి నాయక’ సినిమాల్లో భారీ తనం చూసి జనాలు షాకైపోయాడు. ఇప్పుడు శ్రీనివాస్ నుంచి రాబోతున్న ‘సాక్ష్యం’ సినిమాలో చాలా ఆకర్షణలే కనిపిస్తున్నాయి. ట్రైలర్ చూస్తేనే ఇందులో భారీతనం ఎలాంటిదో అర్థమవుతోంది. పూజా హెగ్డే.. జగపతిబాబు సహా చాలామంది ప్రముఖ నటీనటులు ఇందులో ఉన్నారు. టెక్నికల్ గానూ ఈ చిత్రం భారీ స్థాయిలో కనిపిస్తోంది.

తాజాగా ఈ చిత్రానికి మరో ఆకర్షణ తోడైంది. ఈ చిత్రానికి ప్రముఖ నటుడు ప్రకాష్ రాజ్ వాయిస్ ఇవ్వడం విశేషం. సినిమా అంతా చూశాక ఎవరైనా ప్రముఖ నటుడి గళంతో సినిమాను నడిపిస్తే బాగుంటుందని దర్శకుడు శ్రీవాస్ ఫీలయ్యాడట. మంచి పారితోషకం ఇచ్చి ఈ పనికి ప్రకాష్ రాజ్ ను ఎంచుకున్నాడట. ఇటీవలే ప్రకాష్ రాజ్ పని పూర్తి చేశాడు. సినిమా చాలా బాగా వచ్చిందని.. కచ్చితంగా పెద్ద హిట్టవుతుందని ప్రకాష్ రాజ్ ఈ సందర్భంగా చెప్పాడు. నిజానికి ముందు ఈ చిత్రానికి వేరే వాళ్లతో వాయిస్ ఇప్పించారు. ఆ వాయిస్ టీజర్.. ట్రైలర్లలో కూడా వినిపిస్తుంది. సినిమాలో దాన్ని ప్రకాష్ రాజ్ వాయిస్ తో రీప్లేస్ చేసినట్లు తెలుస్తోంది. ఈ చిత్రంలో ఓ చిన్న పాత్ర చేసిన గీత రచయిత అనంత్ శ్రీరామ్ సైతం కొన్ని చోట్ల గళం వినిపించబోతున్నాడు. పంచభూతాల నేపథ్యంలో ఈ కథ సాగనుండగా.. వాటి మీద అనంత్ శ్రీరామ్ రాసిన పాటకు అద్భుతమైన స్పందన వస్తోంది. జులై 27న ఈ చిత్రం ప్రేక్షకుల ముందుకొస్తుంది.