ఆల్ అవుట్.. 'మరదలు' ఇన్

సూపర్ స్టార్ మహేష్ బాబు మూవీ బ్రహ్మోత్సవం రిజల్ట్ కారణంగా.. హై రేంజ్ లో కనిపించిన ప్రమోషన్స్ ఆగిపోయాయి. రిలీజ్ కు ముందు చేసిన పబ్లిసిటీ తర్వాత.. కొత్తగా ఏం చేస్తున్నది లేదు. మహేష్ కూడా పట్టించుకుంటున్నట్లుగా కనిపించడం లేదు. ఇక సమంత సంగతి సరే సరి. ఓ ట్వీట్ కూడా చేయకుండా సైలెంట్ అయిపోయింది. కాజల్ సంగతి ఎంత తక్కువ మాట్లాడుకుంటే అంత బెటర్.

ఇప్పుడు మరదలు పిల్ల ఎంటర్ అయింది. అదేనండీ బావ - అత్తారింటికి దారేది - బ్రహ్మోత్సవం.. ఇలా వరుసగా అన్ని సినిమాల్లోనూ మరదలి రోల్స్ కి బ్రాండ్ అంబాసిడర్ గా మారిపోయిన ప్రణీత.. బ్రహ్మోత్సవం పబ్లిసిటీలోకి ఎంట్రీ ఇచ్చింది. ప్రెస్ కి ఇంటర్వ్యూలు కూడా ఇచ్చేస్తోంది. బ్రహ్మోత్సవం లాంటి గొప్ప సినిమాలో చేసే ఛాన్స్ రావడం - మహేష్ తో స్క్రీన్ షేర్ చేసుకోవడం అదృష్టం అంటోంది ప్రణీతా సుభాష్. సూపర్ స్టార్ తో తను కనిపించిన సీన్స్.. తనకు యాక్టర్ గా పేరు తెచ్చిపెడుతున్నాయని అంటోంది.

సినిమాలో ముగ్గురు హీరోయిన్స్ అనే ప్రచారం జరిగినా.. ఆడియో లాంఛ్ ఈవెంట్ నుంచి ప్రణీతను పక్కన పెట్టేశారన్న మాట వాస్తవమే. ప్రీ రిలీజ్ పబ్లిసిటీ కూడా సమంత, కాజల్ మాత్రమే కనిపించారు. ఇప్పుడు వాళ్లు సైలెంట్ అయిపోవడంతో.. నాలుగు సార్లు కనిపించి, రెండు సార్లు మాట్లాడే ఓ బుల్లి కేరక్టర్ చేసిన ప్రణీత.. బ్రహ్మోత్సవం పబ్లిసిటీలో యాక్టివ్ అయిపోయింది.