'సలార్‌' తో ఆ అపవాదుకు ప్రశాంత్ నీల్‌ చెక్‌!

పాన్ ఇండియా సూపర్ స్టార్‌ గా వరుస సినిమాలతో దూసుకు పోతున్న ప్రభాస్ ప్రస్తుతం చేస్తున్న సినిమాల్లో సలార్‌ ఒకటి. కేజీఎఫ్‌ ఫిల్మ్‌ మేకర్‌ ప్రశాంత్‌ నీల్ దర్శకత్వంలో రూపొందుతున్న సలార్‌ సినిమాలో శృతి హాసన్ హీరోయిన్‌ గా నటిస్తున్న విషయం తెల్సిందే. ప్రశాంత్ నీల్‌ యాక్షన్‌ సినిమా అంటే హీరోయిన్స్ కు పెద్దగా ప్రాముఖ్యత ఉండదు అనే అభిప్రాయం ఉంటుంది. కాని ఈసారి సలార్‌ కు తనపై ఉన్న ఆ అపవాదును పోగొట్టుకునేలా ప్రశాంత్‌ నీల్‌ హీరోయిన్ ను కాస్త ఎక్కువ సమయం చూపించడంతో పాటు కథలో ప్రాముఖ్యతను కూడా పెంచినట్లుగా తెలుస్తోంది. సలార్‌ లో శృతి హాసన్‌ పాత్ర చాలా ప్రాముఖ్యతను కలిగి ఉంటుందని ఇండస్ట్రీ వర్గాల వారు అంటున్నారు.

శృతి హాసన్‌ ను సలార్‌ లో జర్నలిస్ట్‌ గా ప్రశాంత్ నీల్ చూపించబోతున్నాడట. జర్నలిస్ట్ గా శృతి హాసన్ చేసే సాహసాలు అన్నీ ఇన్నీ కావంటున్నారు. శృతి హాసన్ తో ఏకంగా స్టంట్స్ ను కూడా దర్శకుడు చేయించబోతున్నట్లుగా తెలుస్తోంది. కేజీఎఫ్‌ సినిమాలో చూస్తే హీరోయిన్‌ కు పెద్దగా ప్రాముఖ్యత ఉండదు. కాని సలార్ సినిమాలో మాత్రం శృతి హాసన్ కు ప్రభాస్‌ కు జోడీగా మంచి అవకాశం దక్కడంతో పాటు నటనకు కూడా ప్రాముఖ్యత ఉన్న పాత్ర లభించడం జరిగిందని అంటున్నారు. ట్యాలెంటెడ్‌ బ్యూటీగా పేరున్న ఈ అమ్మడికి సలార్‌ సినిమా ఖచ్చితంగా ఒక ఛాలెంజ్ అనడంలో సందేహం లేదు.

ఇటీవలే ప్రభాస్ లేకుండానే సలార్‌ చిత్రీకరణ జరిగింది. అందులో శృతి హాసన్ పై కీలక యాక్షన్‌ సన్నివేశంను చిత్రీకరించినట్లుగా చెబుతున్నారు. భారీ బడ్జెట్‌ తో నిర్మాణం జరుగుతున్న సలార్‌ సినిమాను వచ్చే ఏడాది ఆరంభంలో ప్రేక్షకుల ముందుకు తీసుకు వచ్చేందుకు గాను ఏర్పాట్లు జరుగుతున్నాయి. భారీ ఎత్తున అంచనాలున్న సలార్‌ మూవీ లో ప్రభాస్ లోని మాస్ యాంగిల్ ను పూర్తిగా ప్రశాంత్ నీల్‌ ఆవిష్కరించబోతున్నాడట.