ఈ రెండు సినిమాలతో స్టార్ డైరెక్టర్ మ్యాజిక్ చేస్తాడా..?

పాన్ ఇండియా స్టార్ ప్రభాస్ తో ప్రస్తుతం సలార్ మూవీని సిద్ధం చేస్తున్నాడు డైరెక్టర్ ప్రశాంత్ నీల్. కేజీఎఫ్ సినిమాతో ఒక్కసారిగా ఇండియన్ సినిమా ఇండస్ట్రీ దృష్టిని ఆకర్షించాడు ప్రశాంత్. ఆ సినిమాతో కన్నడ ఇండస్ట్రీ హద్దులను చెరిపేశాడు. అలాగే కన్నడ ఇండస్ట్రీ పై ఉన్న అభిప్రాయాలను కూడా తారుమారు చేసాడు. కేజీఎఫ్ సినిమాతోనే సంచలనం సృష్టించిన ప్రశాంత్.. కేజీఎఫ్-2 పై భారీ అంచనాలను సెట్ చేసాడు. ఇప్పటికే టీజర్ విడుదలై సెన్సేషన్ క్రియేట్ చేసింది. జనాల్లో కేజీఎఫ్ ఫీవర్ మరింత పెరిగిందనే చెప్పాలి. అయితే కేజీఎఫ్-2 మూవీ సమ్మర్ స్పెషల్ కానుకగా జులై 16న విడుదల కాబోతుంది. కేజీఎఫ్ సినిమాతో హీరో యష్ కూడా పాన్ ఇండియా స్టార్డం సొంతం చేసుకున్నాడు.

ఇదిలా ఉండగా.. రాధేశ్యామ్ మూవీ ముగించుకొని ఇప్పటికే సలార్ ఓ షెడ్యూల్ పూర్తిచేసాడు ప్రభాస్. అయితే డైరెక్టర్ ప్రశాంత్ నీల్ సినిమాల గురించి ఏదో ఒక వార్త సోషల్ మీడియాలో డైలీ వైరల్ అవుతూనే ఉంది. కేజీఎఫ్ సినిమాతో దేశవ్యాప్తంగా క్రేజ్ సంపాదించుకున్న ప్రశాంత్ నీల్.. డార్లింగ్ ప్రభాస్ ను ఎన్నడూ చూడని మాస్ లుక్కులో చూపించనున్నాడని తెలుస్తుంది. సలార్ అనే టైటిల్ తోనే ఈ సినిమా పై అంచనాలు ఓ రేంజిలో నెలకొన్నాయి. ప్రస్తుతం రెండో షెడ్యూల్ రెడీ అవుతోందట. అయితే డైరెక్టర్ ప్రశాంత్ నీల్.. ఇటు సలార్ మూవీ సెకండ్ షెడ్యూల్ కు ఏర్పాట్లు చూస్తూనే.. మరోవైపు కేజీఎఫ్-2 పోస్ట్ ప్రొడక్షన్ పనులు చూసుకుంటున్నాడట. ఈ రెండు సినిమాలపై అంచనాలు చూస్తుంటే ఖచ్చితంగా ఇండియన్ బాక్సాఫీస్ షేక్ అవుతుందని సినీవర్గాలు చెబుతున్నాయి. చూడాలి మరి ప్రశాంత్ ఎలాంటి మ్యాజిక్ చేయనున్నాడో!