టాలీవుడ్ పై ఫోకస్ పెడుతూ.. 'కేజీఎఫ్ 2' ను పక్కన పెడుతున్నాడా..?

యావత్ సినీ అభిమానులు ఎంతో ఆస‌క్తిగా ఎదురు చూస్తున్న సినిమాలలో 'కేజీయఫ్ - చాప్టర్ 2' ఒకటి. కన్నడ రాకింగ్ స్టార్ యశ్‌ - డైరెక్టర్ ప్రశాంత్ నీల్ కాంబినేషన్ లో ఈ చిత్రం తెరకెక్కుతోంది. సంచలన విజయం సాధించిన ‘కేజీఎఫ్ -1’ చిత్రానికి సీక్వెల్ గా వస్తున్న చాప్టర్ 2 పై భారీ అంచనాలే నెలకొన్నాయి. ఇప్పటికే విడుదలైన ప్రచార చిత్రాలు - టీజర్ విశేషంగా ఆకట్టుకున్నాయి. ప్రస్తుతం ఈ చిత్రానికి సంబంధించిన పోస్ట్ ప్రొడక్షన్ వర్క్స్ జరుగుతున్నాయి. అయితే ప్రశాంత్ నీల్ 'కేజీఎఫ్ 2' కంటే తెలుగు సినిమాలకు ఎక్కువ ప్రాధాన్యత ఇస్తున్నాడని కన్నడ అభిమానులు కామెంట్స్ చేస్తున్నారని తెలుస్తోంది.

'కేజీఎఫ్ 1' సినిమా పాన్ ఇండియా స్థాయిలో విడుదలై సక్సెస్ అయిన వెంటనే టాలీవుడ్ నిర్మాతలు ప్రశాంత్ నీల్ పై కర్చీఫ్ వేసారు. ఈ నేపథ్యంలో 'కేజీఎఫ్ 2' రిలీజ్ కోసం వెయిట్ చేయకుండా.. యంగ్ రెబల్ స్టార్ ప్రభాస్ తో 'సలార్' సినిమా స్టార్ట్ చేసేశాడు. ఇదే క్రమంలో యంగ్ టైగర్ ఎన్టీఆర్ తో ఓ సినిమాని అనౌన్స్ చేశాడు. ప్రస్తుతం టాలీవుడ్ మోస్ట్ వాంటెడ్ డైరెక్టర్ గా మారిన ప్రశాంత్ నీల్.. మరో ఇద్దరు టాలీవుడ్ స్టార్ హీరోలతో చర్చలు జరుపుతున్నారు. 'కేజీఎఫ్ 2' చిత్రానికి సంబంధించిన ప్యాచ్ వర్క్ ని ముందుగా ఫినిష్ చేయకుండా.. తెలుగు సినిమాలపై దర్శకుడు ఫోకస్ పెట్టడంపై ఓ వర్గం కన్నడిగులు కోపంగా ఉన్నట్లు తెలుస్తోంది. కన్నడ సినిమా స్థాయిని పెంచే 'కేజీఎఫ్ 2' చిత్రాన్ని పట్టించుకోవడం లేదని విమర్శలు చేస్తున్నారు.

అయితే ప్రశాంత్ నీల్ మాత్రం 'కేజీఎఫ్ 2' సినిమాపై ఫుల్ కాన్ఫిడెంట్ గా క్లారిటీగా ఉన్నట్లు తెలుస్తోంది. మొదటి పార్ట్ కు ఏమాత్రం తగ్గకుండా చాప్టర్ 2 ని తెరకెక్కిస్తున్నట్లు ఇప్పటికే విడుదలైన టీజర్ చూస్తే అర్థం అవుతోంది. ఇక రిలీజ్ డేట్ ని ఫిక్స్ చేసే దాన్ని బట్టి కన్నడ బాహుబలి పనులు చూసుకునేలా ప్లాన్ చేసుకున్నారట. 'సలార్' చిత్రానికి కూడా హోంబలే ఫిలింస్ వారే నిర్మాతలు కాబట్టి.. వారితో ముందుగానే డిస్కష్ చేసుకునే ముందుకు వెళ్లినట్లు సన్నిహిత వర్గాలు చెబుతున్నాయి. అలానే 'కేజీఎఫ్ 2' సినిమా కోసం దర్శకుడు క్రేజీ ప్రమోషన్స్ సిద్ధం చేసారని అంటున్నారు.