ముగ్గురు హీరోల '3 కజిన్స్' చేస్తున్నాడా?

విభిన్న చిత్రాలతో ఆకట్టుకుంటున్న దర్శకుడు ప్రవీణ్ సత్తారు. నేషనల్ అవార్డ్ ఫిలిం తర్వాత గుంటూరు టాకీస్ అంటూ బ్లాక్ కామెడీ రూపొందించిన ప్రవీణ్ సత్తారు.. రీసెంట్ గా పీఎస్వీ గరుడవేగ అంటూ గ్రిప్పింగ్ థ్రిల్లర్ అందించిన వైనం ఆకట్టుకుంది. హీరో రాజశేఖర్ ను మళ్లీ ట్రాక్ తెచ్చిన ఈ డైరెక్టర్.. ఇప్పుడు మరో ప్రయోగానికి సిద్ధమైపోతున్నాడు.

ఇప్పటికే తన మరుసటి చిత్రానికి స్టోరీ.. స్క్రిప్ట్ రెడీ చేసేసుకోగా.. ముగ్గురు హీరోలతో మల్టీస్టారర్ చేసేందుకు రెడీ అయిపోతున్నాడట. గరుడవేగ తర్వాత చాలానే ఆఫర్స్ వచ్చినా.. తన స్టైల్ లో ఓ కొత్త తరహా సినిమాను అందించేందుకు ప్రవీణ్ సత్తారు ఫిక్స్ అయినట్లు తెలుస్తోంది. ఈ దర్శకుడి లేటెస్ట్ ప్రాజెక్టులో ముగ్గురు హీరోలు లీడ్ రోల్స్ లో కనిపించనున్నారట. ఈ పాత్రలలో ఇప్పటికే యంగ్ హీరో నితిన్.. భల్లాలదేవుడు రానాలను రెండు రోల్స్ కు ఖాయం చేసుకున్నాడట కూడా. నితిన్.. రానాలు ఈ స్టోరీ వినగానే తెగ థ్రిల్ అయ్యారని.. అందుకే వెంటనే యాక్సెప్ట్ చేశారని అంటున్నారు.

అయితే.. మూడో రోల్ కోసం ఇంకా ఎవరినీ ఖాయం చేసుకోలేదు కానీ.. నారా రోహిత్ తో చేయించాలనే ఆలోచన ఉందట. ఈ ప్రాజెక్టుకు "3 కజిన్స్" అనే పేరు నిర్ణయించే అవకాశం ఉందని సన్నిహితుల ద్వారా తెలుస్తోంది. మూడో హీరోతో పాటు హీరోయిన్ పాత్రలు ఫిక్స్ అయిన తర్వాత.. ఈ ప్రాజెక్టుపై అఫీషియల్ అనౌన్స్ మెంట్ వచ్చే అవకాశం ఉంది.