ప్రీతి.. పేరు మార్చుకోలేదంట

హీరోయిన్లు పేరు మార్చుకోవడం ఎప్పుడూ పెద్ద విశేషమేమీ కాదు. అసలు పేరుకు బదులుగా.. స్క్రీన్ నేమ్ తో పాపులారిటీ సంపాదించుకున్నవారే ఎక్కువగా కనిపిస్తారు. అయితే.. ఓసారి గుర్తింపు సంపాదించుకున్న తర్వాత.. మళ్లీ పేరు మార్చుకోవడం అంతగా కనిపించదు.

బాలీవుడ్ సీనియర్ బ్యూటీ ప్రీతి జింటా విషయంలో మాత్రం ఇప్పుడు తెగ హంగామా జరుగుతోంది. ఆమె పేరు ప్రీతమ్ సింగ్ జింటా అంటూ మీడియాలో కథనాలు వస్తున్నాయి. సినిమాల కోసం ప్రీతి జింటా అని పేరు మార్చుకుందని వీటి సారాంశం. ఇదే విషయాన్ని ఓపెన్ సోర్స్ అయిన వికిపీడియాలో కూడా ఎవరో అప్ డేట్ చేసేశారు. ఈ అంశంపై ఇప్పుడు ప్రీతి జింటా స్పందించింది. తన పేరును మీడియా జనాలు మార్చేయడం ఈమెకు తెగ కోపం తెప్పించేసింది కూడా. తన అసలు పేరు ప్రీతి జింటానే అని చెప్పిన ఈ భామ.. సోల్జర్ మూవీ షూటింగ్ సమయంలో బాబీ డియాల్ తన పేరును ప్రీతమ్ గా మార్చినట్లు చెప్పింది ప్రీతి.

'సోల్జర్ మూవీ షూటింగ్ లో భాగమైన కుర్రాళ్లలో నేను కూడా ఉన్నా. అందుకే అలా మార్చారంతే. అంతే తప్ప.. వికీపీడియాలో ఉందనో.. ఇంకోటో చెప్పి నా పేరు మార్చేయకండి. నా పేరు అప్పుడే కాదు.. ఇప్పుడు కూడా ప్రీతి జింటా.. అంతే' అంటూ ఫుల్లు క్లారిటీ ఇచ్చేసింది ఈ భామ. గతేడాది జీని గుడెనఫ్ ను పెళ్లి చేసుకున్న ఈ భామ.. మళ్లీ తెరపై ఎప్పుడు కనిపిస్తుందో మాత్రం చెప్పలేదు.