సల్మాన్ రికార్డులన్నీ తిరగరాశాడు

ప్రేమ్ రతన్ ధన్ పాయో.. టాక్ చూస్తే అందరూ ఏవరేజ్ అన్నారు. రివ్యూలు కూడా అలాగే వచ్చాయి. కానీ ఈ సినిమా దీపావళి నాడు బాక్సాఫీస్ ను షేక్ చేసేసింది. అలవోకగా రూ.400 కోట్లు కొల్లగొట్టి ఆశ్చర్యపరిచింది. అసలే సల్మాన్ ఖాన్.. పైగా అతడితో మెగా హిట్లు కొట్టిన సూరజ్ బర్జాత్యా దర్శకత్వంలో నటించాడు.. తెర మీద కావాల్సినంత భారీతనం.. మంచి పాటలు.. అందులోనూ పండగ టైంలో వచ్చిన సినిమా.. జనాలకు ఇంకేం కావాలి.. తెగ ఎగబడ్డారు. కంటెంట్ పరంగా యావరేజ్ సినిమానే.. కలెక్షన్ల పరంగా బ్లాక్ బస్టర్ అయి కూర్చుంది. ఐతే ‘ప్రేమ్ రతన్ ధన్ పాయో’ సంచలనాలు థియేటర్ల వరకే పరిమితం అయిపోలేదు. ఇప్పుడు టెలివిజన్లోనూ ఆ సినిమా ప్రకంపనలు రేపింది.

ఇటీవలే స్టార్ గోల్డ్ ఛానెల్లో ‘ప్రేమ్ రతన్ ధన్ పాయో’ ఫస్ట్ ప్రిమియర్ షో వేశారు. ఈ సందర్భంగా ఇండియన్ సినిమాలకు సంబంధించి టెలివిజన్ టీఆర్పీ రేటింగుల రికార్డులన్నీ బద్దలైపోయాయి. వరల్డ్ లెవెల్లో ఈ చిత్రానికి 16.4 టీఆర్పీ రేటింగ్ దక్కింది. ఇప్పటిదాకా ఏ భారతీయ సినిమాకు కూడా ఈ స్థాయి రేటింగ్ రాలేదు. దీనికి ముందు రికార్డు కూడా సల్మాన్ సినిమా ‘భజరంగి భాయిజాన్’ పేరు మీదే ఉంది. దాన్ని ‘ప్రేమ్ రతన్..’ బద్దలు కొట్టింది. దీంతో ఇండియాలో సల్మాన్ ఖాన్ ఏ స్థాయిలో ఉంది అన్న సంగతి మరోసారి రుజువైంది. ఏవరేజ్ సినిమాకే ఇలాంటి రెస్పాన్స్ ఉందంటే.. ఒకవేళ ‘ప్రేమ్ రతన్ ధన్ పాయో’కు ‘భజరంగి భాయిజాన్’కు వచ్చినట్లు మంచి టాక్ వచ్చి ఉంటే పరిస్థితి ఎలా ఉండేదో.