డబుల్ ప్రేమ్ దెబ్బకి.. రికార్డుల బ్రేక్

సల్మాన్ ఖాన్ సినిమా అంటేనే సంచలనం. అలాంటిది సెన్సేషనల్ కాంబినేషనల్ తెరకెక్కితే ఇక రికార్డుల సంగతి చెప్పాలా.. తిరగరాయడం - సృష్టించడం - లెక్కెట్టుకోవడం.. ఇలాగే ఉంటుంది కథ. అయినా ఇవన్నీ సల్లూ భాయ్ కి బాగా అలవాటైపోయిన వ్యవహారమే. దీపావళి సందర్భంగా రిలీజ్ అయిన ప్రేమ్ రతన్ ధన్ పాయో.. రికార్డుల మోత మోగిస్తోంది.

పండుగ మరుసటి రోజు థియేటర్లలోకి వచ్చిన ఈ మూవీ.. తొలి రోజున 40.35 కోట్లు గ్రాస్‌ కలెక్షన్లను కొల్లగొట్టేసింది. దేశవ్యాప్తంగా 4500 షుమారు థియేటర్లలో సందడి చేస్తున్న ప్రేమ్ రతన్ ధన్ పాయో.. కండలవీరుడి సినిమాల్లోనే బిగ్గెస్ట్ ఫస్ట్ డే కలెక్షన్స్ సాధించింది. సూరజ్ ఆర్ బర్జాత్యా డైరెక్షన్ లో గతంలో వచ్చిన హమ్ ఆప్ కే హై కౌన్ - మైనే ప్యార్ కియాల మూవీస్ చేసిన మ్యాజిక్ ని మరోసారి రిపీట్ చేస్తోంది ఈ మూవీ. సల్మాన్-సూజర్ ల కాంబినేషన్ కి మంచి డిమాండ్ ఉంది. దీనికి తగ్గట్లుగానే సినిమా ఉండడం.. ప్రేమ్ గా సల్లూభాయ్ చేసిన చిత్రాలన్నీ సెన్సేషనల్ హిట్స్ కావడం బాగా ప్లస్ అయింది. అలాగే మూవీ అంతా విజువల్ ట్రీట్ మాదిరిగా ఉండడం అదనపు ఆకర్షణ. అన్నిటికంటే ముఖ్యంగా.. సల్మాన్ డబుల్ రోల్ ఫ్యాన్స్ కి దివాలీ గిఫ్ట్ అయిపోయింది. సోనమ్ కపూర్ తో సల్మాన్ చేసిన రొమాంటిక్ సన్నివేశాలను హైలైట్ గా చెబుతున్నారు.

జూలైలో విడదలై సల్లూ భాయ్ కెరీర్ బిగ్గెస్ట్ హిట్ గా నిలిచిన భజరంగీ భాయిజాన్.. మొదటి రోజు సాధించిన వసూళ్లు 27.25కోట్లే. కానీ ప్రేమే రతన్ ధన్ పాయో మాత్రం.. మొదటిరోజునే 40 దాటేయడం విశేషం. ఈ స్పీడ్ వీకెండ్స్ దాటేవరకూ ఉండనుండడంతో.. కొత్త రికార్డుల మోతకు సల్మాన్ సిద్ధమవుతున్నాడు.