ప్రేమాలయం ప్రేమ్ మళ్లీ వస్తున్నాడు

ప్రేమ పావురాలు - ప్రేమాలయం - ప్రేమానురాగం.. ఇవన్నీ తెలుగులో డబ్ అయిన సల్మాన్ ఖాన్ ప్రేమ రూపాలు. వీటన్నిటిలోనూ ఉండే కామన్ పాయింట్ సల్మాన్ ఖాన్. సూరజ్ ఆర్ బరజాత్యా తీసే అన్ని మూవీస్ లోనూ సల్లూ భాయ్ పేరు ప్రేమ్ మాత్రమే ఉంటుంది. ఓసారి భాగ్యశ్రీ, మరోసారి మాధురీ దీక్షిత్, ఇంకసారి సోనాలి బింద్రే... వీళ్లందరితో ప్రేమ్ అడే ప్రేమ సయ్యాటలు అద్భుతంగా ఉంటాయి రాజశ్రీ బ్యానర్ లో.

రాజశ్రీ వాళ్ల పిక్చర్స్ అంటేనా భారీతనం ఉంటుంది. స్క్రీన్ మీద ఒకేసారి పదుల కొద్దీ జంటలు - వందల కొద్దీ సైట్ యాక్టర్స్ - భారీ సెట్స్ - కళ్లు మిరుమిట్లుగొలిపే డెకరేషన్.. అంతా ఓ విజువల్ ట్రీట్ లా ఉంటాయి. ఇప్పుడు ప్రేమ్ రతన్ ధన్ పాయో కూడా.. పాత వాటిని మించిన భారీతనం కనిపిస్తోంది. ముఖ్యంగా నేను తిరిగొచ్చేశానంటున్న సల్మాన్ డైలాగ్ అదుర్స్. ఒకోసారి నిన్ను చూస్తుంటే వేరే ఎవరో అనిపిస్తోందంటూ సోనమ్ ఇచ్చే ఫినిషింగ్.. అసలు ట్విస్ట్. మొత్తానికి మరోసారి భారతీయత ఉట్టిపడేలా విజువల్స్ తోనే పండగ చేసేయబోతున్నాడు ప్రేమ్.

1999లో వచ్చిన హమ్ సాథ్ సాథ్ హై తర్వాత.. సూరజ్ బరజాత్యా - సల్మాన్ కాంబినేషన్ లో మళ్లీ మూవీ రాలేదు. ఇప్పుడా ప్రేమ్ రతన్ ధన్ పాయో అంటూ.. ఈసారి సోనమ్ కపూర్ తో రొమాన్స్ చేయబోతున్నాడు ప్రేమ్ అలియాస్ సల్మాన్.