‘ప్రేమమ్’ అందాల విందుకు సిద్ధమవండి..

కొందరు హీరోల కోసం సినిమాకొస్తారు.. కొందరు దర్శకుల మీద గురితో థియేటర్లలోకి అడుగుపెడతారు. ఇంకొందరి అభిరుచి ఇంకోలా ఉంటుంది. అలాగే హీరోయిన్ల కోసం కూడా థియేటర్లకు వచ్చేవాళ్లు కూడా తక్కువేమీ కాదు. హీరోయిన్ల పాత్రలు బలంగా ఉండి.. ఆ పాత్రల్లో అందమైన.. ఆకర్షణీయమైన హీరోయిన్లు నటిస్తే సినిమాకు బాగా ప్లస్ అవుతుంది. ఈ శుక్రవారం ప్రేక్షకుల ముందుకు రాబోతున్న ‘ప్రేమమ్’ సరిగ్గా ఈ లక్షణాలున్న సినిమానే. ఇందులో ఒకరు ఇద్దరు కాదు.. ఏకంగా ముగ్గురు హీరోయిన్లున్నారు. ఆ ముగ్గురూ కూడా అందగత్తెలే. చక్కగా నటించగలిగిన వాళ్లే. పైగా సినిమాలో మూడు పాత్రలూ చాలా బాగుంటాయి.

మలయాళ ‘ప్రేమమ్’లో నటించిన అనుపమ పరమేశ్వరన్.. మడోన్నా సెబాస్టియన్ తెలుగులోనూ తమ పాత్రల్ని పోషిస్తున్నారు. ఇక సాయిపల్లవి చేసిన మలార్ పాత్రను తెలుగులో శ్రుతి హాసన్ చేస్తోంది. అనుపమ ఆల్రెడీ ‘అఆ’లో నటించి మెప్పించింది. ‘ప్రేమమ్’లో ఆమెది ఇంకా కీలకమైన పాత్ర. హీరోను టీనేజ్ లో ప్రేమలో పడేసేది ఈ అమ్మాయే. ఈ రింగు జుట్టు సుందరి తెలుగు ప్రేక్షకుల్ని కూడా మాయలో పడేస్తుందని భావిస్తున్నారు. ఇక మలయాళంలో మడోన్నా పాత్ర కొంచెం చిన్నదే. తెలుగులోకి వచ్చేసరికి ఆమె పాత్రను పెంచారు. పాటలు కూడా జోడించారు. నేచురల్ బ్యూటీ అయిన మడోన్నా తొలిసారి తెలుగు ప్రేక్షకుల్ని పలకరిస్తోంది. ఈ సినిమాకు ఆమె ఆకర్షణగా నిలుస్తుందని భావిస్తున్నారు. ఇక శ్రుతి హాసన్ గురించి చెప్పాల్సిన పని లేదు. ఆల్రెడీ మన ఆడియన్స్ ఆమె మాయలో ఉన్నారు. స్టూడెంట్ చైతూను ప్రేమలో ముంచెత్తే లెక్చరర్ పాత్రలో ఆమె కనువిందు చేసేలా ఉంది. మొత్తానికి ముగ్గురు హీరోయిన్లూ తెలుగు ప్రేక్షకుల్ని ‘ప్రేమమ్’లో పడేయడం ఖాయమనిపిస్తోంది.